Ukraynaya 90 milyard avroluq Aİ-nin dəstək krediti...

...SİA xəbər verir ki, Avropa Parlamentinin mətbuat xidmətinin məlumatına görə, Avropa Parlamenti Ukraynaya 90 milyard avroluq Aİ dəstək krediti vermək üçün gücləndirilmiş əməkdaşlıq prosedurundan istifadəni təsdiqləyib.

Üzvlər çərşənbə günü müvafiq qərar qəbul edərək, Aİ Şurasına bütün Aİ üzv dövlətlərinin yekdil dəstəyi olmadan bir qrup üzv dövlətin əməkdaşlıq etməsinə imkan verən xüsusi mexanizmdən istifadə etməyə icazə veriblər.

Ukrayna üçün dəstək krediti 18 dekabr 2025-ci ildə Brüsseldə keçirilən Avropa Şurasının zirvə toplantısında razılaşdırılıb və 14 yanvar 2026-cı ildə Avropa Komissiyası tərəfindən rəsmi olaraq təqdim edilib.

Lakin Çexiya, Macarıstan və Slovakiya bu qərarı dəstəkləməkdən imtina ediblər.

Buna görə də Aİ gücləndirilmiş əməkdaşlıq prosedurundan - Aİ müqavilələrində nəzərdə tutulan və Avropa Parlamentinin ayrıca təsdiqini tələb edən mexanizmdən istifadə etmək qərarına gəlib.

Qərar səs çoxluğu ilə qəbul edilib:

- 499 üzv lehinə səs verib;

-135 nəfər əleyhinə səs verib;

-24 nəfər bitərəf qalıb.

-Əvvəlki gün, çərşənbə axşamı günü Avropa Parlamenti də bu məsələnin və əlaqəli qanunvericilik təkliflərinin nəzərdən keçirilməsini sürətləndirməyə razılaşıb.

Növbəti addım, adi qanunvericilik proseduru vasitəsilə Avropa Parlamenti və Aİ Şurası arasında kredit proqramının təfərrüatları barədə razılığa gəlmək olacaq.

Əli Babayev