Avropanın ən varlı ölkəsi vergiləri artırmaq qərarına gəlib...

...Geosiyasi vəziyyətin pisləşməsi səbəbindən İsveçrə Federal Şurası müdafiə qabiliyyətini əhəmiyyətli dərəcədə gücləndirmək qərarına gəlib ki, bu da vergi artımlarını tələb edəcək.

SİA xəbər verir ki, bu barədə İsveçrə hökumətinin mətbuat açıqlamasında bildirilib.

Qeyd olunur ki, İsveçrə ordusunun və mülki təhlükəsizlik xidmətlərinin gücləndirilməsi üçün təxminən 31 milyard İsveçrə frankı (...təxminən 33,8 milyard avro) əlavə vəsait tələb olunacaq. Bu xərcləri maliyyələşdirmək üçün hökumət 2028-ci ildən başlayaraq on il müddətinə əlavə dəyər vergisinin (ƏDV) müvəqqəti və məqsədyönlü şəkildə 0,8 faiz bəndi artırılmasını təklif edir.

Nəticədə əldə edilən əlavə gəlir kredit cəlb etmək imkanına malik xüsusi silah fonduna yönəldiləcək.

Bu vəsait əsasən ordu üçün silah alınmasında istifadə olunacaq.

...Əhalini və ölkəni qorumaq, eləcə də Avropa müdafiə arxitekturasında gələcək təhlükəsizlik risklərinin qarşısını almaq üçün əlavə maliyyə resursları lazımdır; hərbi xərclərin 2032-ci ilə qədər ÜDM-in 1 faizinə qədər artırılmasının planlaşdırılması kifayət deyil, - deyə mətbuat açıqlamasında qeyd olunur.

İsveçrənin mövcud qaydalarına görə, müvafiq qərar rəsmiləşdirildikdən və parlamentdən keçdikdən sonra 2027-ci ilin yayına planlaşdırılan milli referendumda təsdiqlənməlidir. Təsdiqlənərsə, ƏDV artımı 1 yanvar 2028-ci il tarixindən qüvvəyə minəcək.

Əli Babayev