“British Airways”ə məxsus təyyarə uçuşa davam edib...təkəri düşsə də...

"British Airways" aviaşirkətinə məxsus "Airbus A350" təyyarəsi ABŞ-ın Las-Veqas şəhərində yerləşən Harry Reid Beynəlxalq Hava Limanından qalxış zamanı təkərlərindən birini itirib. Buna baxmayaraq, ekipaj uçuşu dayandırmayıb və təyyarə doqquz saatdan çox davam edən reysi problemsiz şəkildə başa vuraraq Londona eniş edib.

SİA xəbər verir ki, söhbət "British Airways"in BA274 reysini həyata keçirən "Airbus A350-1000" model təyyarəsindən gedir.

Hadisə yerli vaxtla səhər saat 05:00 radələrində baş verib. Təyyarə Las-Veqas hava limanının 26R uçuş-enmə zolağında hərəkətə başladıqdan təxminən 40 saniyə sonra eniş qurğusunda qığılcımlar görünüb. Qalxış mərhələsində arxa sağ tərəfdə yerləşən təkər qoparaq düşüb. Bu anlar "Flightradar24" platformasının canlı yayım görüntülərində də əks olunub. İnsident nəticəsində xəsarət alan olmayıb.

"La Dépêche" nəşrinin məlumatına əsasən, ABŞ Federal Aviasiya Administrasiyası (FAA) daha sonra təyyarənin Londona "tam təhlükəsiz şəkildə" eniş etdiyini təsdiqləyib. Las-Veqas hava limanı administrasiyası da insidenti təsdiqləyərək, hadisədən məlumatlı olduqlarını və düşən təkərin hava limanı ərazisində tapılaraq götürüldüyünü bildirib.

"British Airways" isə BBC-yə açıqlamasında istintaq çərçivəsində səlahiyyətli qurumlarla əməkdaşlıq etdiyini qeyd edib.

Hazırda bu hadisənin dəqiq səbəblərini müəyyənləşdirmək üçün araşdırmalar aparılır.