Çin ucqar dağ vadilərində gizli şəkildə nüvə obyektləri tikir...

...Çin cənub-qərbi Siçuan əyalətinin ucqar dağ vadilərində gizli nüvə kompleksləri inşa edir.

SİA xəbər verir ki, bu barədə The New York Times qəzeti peyk görüntülərinə istinadən məlumat yayıb.

Jurnalistlərin və mütəxəssislərin diqqətini cəlb edən əsas yerlərdən biri Çin mühəndislərinin yeni bunkerlər və qoruyucu bəndlər tikdiyi Çzitun vadisidir.

Peyk məlumatları yüksək təhlükəli materialların - ehtimal ki, nüvə başlıqlarında detonator kimi istifadə edilən adi partlayıcı maddələrin istehsalını göstərən çoxsaylı bacaları göstərir. İkiqat hasarla əhatə olunmuş başqa bir yer, Pintonq, plutonium tərkibli nüvə başlıqlarının istehsalında ixtisaslaşıb.

117 metr hündürlüyündə ventilyasiya bacası olan mərkəzi struktur bu yaxınlarda təmir edilib, yeni ventilyasiya dəlikləri və istilik yayıcıları əlavə edilib. Yaxınlıqda aktiv tikinti işləri davam edir və girişin üstündəki nəhəng bir yazıda Çin lideri Si Cinpinin sözləri oxunur: "Təsis məqsədinə sadiq qalın və missiyamızı həmişə xatırlayın".

Kosmosdan görünən bu şüar nüvə genişlənməsinin ideoloji əsasını simvolizə edir. Bu komplekslər 1960-cı illərdə Mao Zedongun "Üçüncü cəbhə" layihəsinin bir hissəsi olaraq yaradılan gizli obyektlər şəbəkəsinin yalnız bir hissəsidir.

O dövrdə on minlərlə alim nüvə proqramını ABŞ və ya SSRİ-nin hücumlarından qorumaq üçün dağlarda laboratoriyalar qurmuşdular.

1980-ci illərin yumşalmasından sonra bu obyektlərin bir çoxu azaldılmışdı, lakin modernləşdirmə 2019-cu ildən bəri sürətlənib.

...Bu obyektlərdə gördüyümüz dəyişikliklər Çinin qlobal supergüc olmaq kimi daha geniş məqsədləri ilə uyğun gəlir. Nüvə silahları bunun ayrılmaz hissəsidir, - deyə coğrafi kəşfiyyat üzrə ekspert Renni Babiarz qeyd edir.

Pentaqon Çinin artıq 600-dən çox döyüş başlığına sahib olduğunu və 2030-cu ilə qədər bu sayı ikiqat artırmağı planlaşdırdığını təxmin edir.

Bu, ABŞ və ya Rusiya arsenallarından kiçik olsa da, artım Vaşinqtonda həyəcana səbəb olur.

Dövlət katibinin müavini Tomas G. DiNanno Pekini qlobal moratoriumu pozan gizli nüvə sınaqlarında günahlandırdı. RAND Korporasiyasından Maykl S. Çeyz şərh edir ki, "Çin ABŞ-ın nüvə təzyiqindən əsasən immunitetli olduğuna inandığı bir vəziyyətdə olmaq istəyir".

Əli Babayev