Rus komandirləri əsgərlərdən onlara pul ödəməyi tələb edirlər...

...Ukraynadakı rus komandirləri hücum missiyalarına göndərilmək təhlükəsi ilə tabeçiliyində olanları onlara böyük məbləğdə pul ödəməyə məcbur edirlər.

SİA-nın məlumatına görə, The Telegraph qəzeti bunu Müharibə Tədqiqatları İnstitutunun (ISW) əsgər və mütəxəssislərinin ifadələrinə istinadən xəbər verir.

Onların sözlərinə görə, bunlar təcrid olunmuş hadisələr deyil, sistemli bir təcrübədir.

Təqdim olunan bir videoda kiçik çavuş Denis Kolesnikov komandirlərin əsgərlərdən 13.000-40.000 dollar tələb etdiyini və ödəməkdən imtina edənlərin ölümcül missiyalara göndərilərək "sıfırlandığını" bildirir.

O, bölməsinin "yarıdan çoxunun" artıq bu şəkildə öldüyünü iddia edir. Kolesnikovun sözlərinə görə, ilkin ödənişlər "tükəndikdən" sonra yeni şantajlar başlayır.

Ondan 40.000 dollar tələb edildikdən sonra o, bölməsindən qaçıb; onun hazırkı yeri məlum deyil.

Başqa bir videoda 36-cı Başqırd Motoatıcı Alayının əsgəri Andrey Perevozçikov Rusiya Prezidenti Vladimir Putinə komandirlərin dronları, termal görüntü kameralarını və bölmələri üçün nəzərdə tutulmuş humanitar yardımı satdıqları və əsgərləri avadanlıqları özləri almağa məcbur etdikləri barədə şikayətlə müraciət edir.

Onun sözlərinə görə, imtina edənlər hücum tapşırıqlarına göndərilir.

Nəşrdə həmçinin 67899 saylı hərbi hissədən olan əsgər Valeri Beloqlazovun atasının video mesajı da yer alır.

O, bölməyə 800.000 rubl bağışladıqdan sonra itkin düşən oğlunun tapılmasında kömək istəyir.

...Başqa bir əsgər İqor Korşunovdan ağır yaralandıqdan sonra komandiri onun cəbhə xəttindən transferi üçün təxminən 2 milyon rubl tələb edib və imtina edəcəyi təqdirdə onu cəbhə xəttinə göndərəcəyi ilə hədələyib.

...Başqa bir əsgər Armen Ovesepyan döyüş tapşırıqlarından azad olmaq üçün aylıq maaşının yarısından çoxunu verməyə məcbur edildiyini bildirib.

...Amerika Müharibə Tədqiqatları İnstitutu rus komandirlərin yaralıları xəstəxanaya göndərməkdən və ya müavinətlər üçün sənədləri emal etməkdən imtina edərək pul tələb etdiyi halları sənədləşdirib.

Əli Babayev