Atəşkəs elə ilk gün pozuldu...

...ABŞ və İran arasında iki həftəlik atəşkəs elan edildikdən sonrakı ilk gün təhlükə altında idi. Vəziyyət İsrailin Livana kütləvi hücumları və Tehranın sərt açıqlamaları ilə daha da pisləşdi.

SİA-nın əldə etdiyi məlumata görə, bu barədə The Wall Street Journal xəbər verir.

İran ABŞ-ı müqavilənin əsas şərtlərini pozmaqda günahlandırdı.

İran Parlamentinin sədri Məhəmməd Bağır Qalibaf Vaşinqtonun hərəkətlərinin həm atəşkəsi, həm də potensial uzunmüddətli sülh danışıqlarını pozduğunu bildirdi.

Qlobal neft ticarəti üçün vacib marşrut olan Hörmüz boğazı ətrafındakı vəziyyət gərginliyi daha da artırdı.

ABŞ-ın onun açıldığını iddia etməsinə baxmayaraq, gəmiçilik trafiki kəskin şəkildə azalıb.

Son 24 saat ərzində yalnız bir neçə gəmi keçib, münaqişədən əvvəl isə bu rəqəm 100-dən çox idi.

Mənbələrə görə, İran gəmilərdən keçidlərini əvvəlcədən əlaqələndirmələrini və bunun üçün pul ödəmələrini tələb edir. Bu arada, danışıqlarda birbaşa iştirak etməyən İsrail Livanda "Hizbullah"a qarşı hərbi əməliyyatları davam etdirib.

Tehran atəşkəsin İsrailin hərəkətlərinə də şamil edilməli olduğunu, əks halda müqavilənin mənasız olduğunu israr edir. İran həmçinin hava məkanında düşmən dronlarının görünməsi də daxil olmaqla, qanun pozuntuları barədə məlumat verib. Buna baxmayaraq, hər iki tərəf - ABŞ və İsrail - hərbi uğurlar iddia edir. Vaşinqton İranın raket proqramının ciddi şəkildə zəiflədiyini, İsrail isə Tehranın hərbi potensialına ciddi ziyan dəydiyini iddia edir.

Əli Babayev