Almaniyada cinayətkarlıq azalıb...

...Almaniya polisi tərəfindən ötən il qeydə alınan cinayətlərin sayı ümumilikdə azalıb, lakin qətllərdə və bir sıra digər xüsusilə ağır cinayətlərdə artım müşahidə olunub.

Bu, Almaniya Daxili İşlər Nazirliyi və Federal Cinayət Polisi İdarəsi (Bundeskriminalamt, BKA) tərəfindən ötən gün açıqlanan statistikaya əsasəndir.

SİA xəbər verir ki, DW-nin məlumatına görə, bu statistika bütün 16 federal ştatın məlumatlarına əsaslanır.

Bu məlumatlara görə, 2025-ci ildə Almaniyada 5.508.559 cinayət qeydə alınıb ki, bu da əvvəlki illə müqayisədə 5,6 faiz azdır.

2021-ci ildən bəri ilk dəfə olaraq zorakı cinayətlər də azalıb - illik müqayisədə 2,3 faiz.

Bu arada, bir sıra ağır cinayətlərdə 2024-cü illə müqayisədə əhəmiyyətli artım müşahidə olunub. Yeni psixoaktiv maddələrlə bağlı cinayətlər 25,5, uşaq pornoqrafiyası ilə bağlı cinayətlər isə 19,9 faiz artıb.

Zorlama və ağır cinsi cinayətlər 8,5, qətllər isə 6,5 faiz artıb. Kompüter fırıldaqçılığı və oğurluqlar da artıb.

Almaniya Daxili İşlər vaziri Aleksandr Dobrindt statistikanı təqdim edərkən xəbərdarlıq edib ki, "...Zorakı cinayətlərin azalması yalnız başlanğıcdır, amma rahatlıq üçün səbəb deyil".

Onun sözlərinə görə, "insanların gündəlik həyatlarında özlərini təhlükəsiz hiss etmələrini təmin etmək" üçün əlavə tədbirlər görülməlidir.

Lakin, bu məlumatlar "cinayətkarlığın uzunmüddətli azalmasına nail olmaq" üçün bir fürsət göstərə bilər,- Dobrindt qeyd edib.

BKA prezidenti Holqer Münç də öz növbəsində cinayətkarlığın təbiətindəki dəyişikliyə işarə edib.

O, cinayətkarlığın "daha rəqəmsal, daha beynəlxalq və bəzi sahələrdə daha da zorakı hala gəldiyini" söylədi. Mütəxəssislər ümumi cinayətkarlığın azalmasını 2024-cü ilin aprel ayında Almaniyada kannabisin qismən leqallaşdırılması ilə əlaqələndirirlər.

Narkotiklə əlaqəli cinayətlərin sayı 27,7 faiz azalaraq ümumi statistikaya əhəmiyyətli dərəcədə təsir göstərib. Bununla yanaşı, cinayətlərin açılma nisbəti faktiki olaraq dəyişməz qalıb - 2024-cü ildəki 58 faizə qarşı 57,9 faiz...

Əli Babayev