Rusiyada ayaqsız müharibə veteranı quldurbaşı imiş...

...İkinci Qərb Dairə Hərbi Məhkəməsi Ukraynada gedən döyüşlərdə iştirak edən iki nəfəri adam oğurluğu və hədə-qorxu ilə tələb etməkdə ittiham edərək həbs edib. Müstəntiqlər hesab edirlər ki, bir neçə nəfərin də daxil olduğu qrupa yaralanma nəticəsində hər iki ayağını itirən hərbi komissarlıq əməkdaşı Daniil Astaxov rəhbərlik edib.

SİA xəbər verir ki, bu, "Kommersant" qəzetində araşdırılan iş materiallarından irəli gəlir.

Müstəntiqlərin sözlərinə görə, adam oğurlayan şəxslər ötən il qondarma "LPR" ilə sərhəddən 60 km məsafədə yerləşən Rossoşda fəaliyyət göstəriblər.

Təqsirləndirilən şəxslər zorakılıq tətbiq edərək əvvəlcə 17 yaşlı oğlanı, sonra isə bir qadını qaçırıblar.

Onların azad edilməsi üçün gənc oğlan onlara bir az əmlak, yerli qadın isə 100.000 rus rublu verib.

Zərərçəkənlər daha sonra azad ediliblər.

İlkin məlumata görə, təqsirləndirilən şəxslər başqa bir bölgədən olan cinayətkar təşkilat adından hərəkət etmiş ola bilərlər.

Bu iş üzrə ümumilikdə yeddi nəfər saxlanılıb. Daniil Astaxov və ikinci təqsirləndirilən şəxs Vitali Borisov günahlarını boynuna alıblar.

Əsgərlərin vəkilləri məhkəməyə qədər həbs tədbirlərinin yumşaldılmasını və həbsdən azad edilməsini istəyiblər. Məhkəmə hər iki vəkilin arqumentlərini rədd edib.

Daniil Astaxovun işində hakim onu ​​dəstənin qeyri-rəsmi lideri kimi tanıyan digər təqsirləndirilən şəxslərin ifadələrini, eləcə də cənab Astaxovun cinayət qeydlərini nəzərə alıb.

Əli Babayev