ÜST-dən yeni açıqlama: hantavirusun sayı arta bilər

Ümumdünya Səhiyyə Təşkilatının Baş direktoru Tedros Adhanom Qebreyesus İspaniyanın paytaxtı Madriddə keçirilən mətbuat konfransında hantavirusun yayılması ilə bağlı xəbərdarlıq edib.

Qebreyesus İspaniyaya qəzalı gəmini qəbul etməkdə göstərdiyi həmrəyliyə görə təşəkkür edib. Mövcud vəziyyətin daha böyük bir epidemiyaya işarə etmədiyini qeyd edən Qebreyesus “Ancaq inkubasiya dövrünün uzunluğunu nəzərə alsaq, qarşıdakı həftələrdə yeni vəziyyətlə qarşılaşmaq ehtimalı var”,- deyib.

Qeyd edək ki, aprelin 1-də Argentinanın ən cənub şəhəri Uşuayyadan yola düşən lüks kruiz gəmisi “MV Hondius”da hantavirus epidemiyası aşkarlanıb. Ümumdünya Səhiyyə Təşkilatı üçü ölümlə nəticələnən beş hadisəni təsdiqləyib.

Bəs hantavirus nədir, desək, əsasən gəmiricilər tərəfindən ötürülən bir xəstəlik kimi tanınır. Gəmiricilərin qurumuş nəcisi, sidiyi və tüpürcəyi ilə çirklənmiş havanın nəfəs alması, bəzən gəmiricilərin dişləməsi və ya cızılması ilə yoluxan virus qızdırma, halsızlıq, əzələ ağrısı kimi əlamətlərə səbəb olur. Həm də tənəffüs çatışmazlığına, bəzi hallarda isə daxili qanaxmaya və böyrək çatışmazlığına səbəb ola bilər.