Ukrayna Xarici Kəşfiyyat Xidməti: Kreml bunu ört-basdır edir...

...Rusiya bank sistemində sistemli böhranın əlamətləri aşkar edilir, baxmayaraq ki, Rusiya hakimiyyəti onun zahiri təzahürlərini qismən gizlədir.

SİA xəbər verir ki, bu barədə Ukrayna Xarici Kəşfiyyat Xidmətinin istinad etdiyi Kremlyönlü Makroiqtisadi Təhlil və Qısamüddətli Proqnozlaşdırma Mərkəzinin hesabatında deyilir.

SVR-in məlumatına görə, Rusiya banklarında problemli aktivlərin payı 10 faizi keçib.

Qeyd olunur ki, Beynəlxalq Valyuta Fondu bu səviyyəni bank böhranının başlanması üçün kritik hədd hesab edir və göstərici ardıcıl üçüncü aydır ki, bu səviyyədən yuxarıda qalır.

Mütəxəssislər vəziyyəti "gizli" böhran kimi təsvir edirlər, çünki onların fikrincə, sektordakı pisləşmə problemli kreditlərin restrukturizasiyası və dövlətə məxsus bankların yüksək payı ilə gizlədilir.

Həmçinin qeyd olunur ki, Rusiyanın ÜDM-nin son bir ildə artımı 0,4 faizə qədər yavaşlayıb və şirkətlər arasında gecikmiş borcun həcmi ilk dəfə 8 trilyon rublu keçib.

Bundan əlavə, Rusiya müəssisələrinin demək olar ki, yarısı ödəniş gecikmələrini əsas biznes problemi kimi bildirir.

Əli Babayev