Türkiyədə noyabr ayında növbədənkənar prezident seçkiləri keçirilə bilər

Ərdoğan əvvəllər növbəti prezident seçkilərinin planlaşdırıldığı kimi - 2028-ci ilin may ayında keçirilməli olduğunu bildirmişdi.

SİA xarici KİV-ə istinadən xəbər verir ki, Türkiyənin hakim Ədalət və İnkişaf Partiyası (AK Partiya) noyabr ayında erkən prezident seçkilərinin keçirilməsini nəzərdən keçirir. "Cumhuriyet" qəzetinin mənbələrə istinadən verdiyi məlumata görə, yeni iqtisadi və sosial dəstək tədbirlərinin həyata keçirilməsindən sonra hökumətə dəstək artarsa, bu ssenari mümkün ola bilər.

Qəzetin məlumatına görə, partiya dairələri oktyabr ayında elan edilməsi gözlənilən sosial və iqtisadi paketin təsirini müzakirə edir. Onun effektivliyinin rəy sorğularının nəticələrinə əsasən qiymətləndirilməsi planlaşdırılır.

Qəzet yazır: "Əgər sorğular hakim bloka artan dəstəyi göstərərsə, noyabr ayında erkən seçkilərin keçirilməsi variantına daha ciddi baxılacaq".

Lakin partiya daxilində hələlik fikir birliyi yoxdur. Bəzi AK Partiya liderləri iqtisadi vəziyyətdə əhəmiyyətli dərəcədə yaxşılaşma olmadan seçkilərin keçirilməsinin ciddi risklər daşıdığına inanırlar. Digərləri isə əksinə, əmək haqqı və sosial müavinətlərdə gözlənilən artımın hökumətin seçicilər arasında mövqeyini gücləndirməyə kömək edə biləcəyinə inanırlar.

Nəşrin mənbələrinə görə, son qərar Türkiyə Prezidenti Rəcəb Tayyib Ərdoğanın araşdıracağı ictimai rəy sorğularının nəticələrinə əsasən veriləcək.

"Cumhuriyet" qəzeti qeyd edir ki, bu fonda qarşıdan gələn siyasi mövsüm Türkiyə üçün son illərin ən hadisəli mövsümlərindən biri ola bilər.

Bu arada, Ərdoğan əvvəllər növbəti prezident seçkilərinin planlaşdırıldığı kimi - 2028-ci ilin may ayında keçirilməli olduğunu bildirmişdi.

ASAL Araştırma tədqiqat şirkətinin apardığı sorğuya görə, Türkiyə vətəndaşlarının təxminən 60%-i erkən ümumi seçkilərin keçirilməsini dəstəkləyir.