The Guardian: Lukaşenko müharibədə daha fəal iştirak etməyə hazırlaşır

...Ukrayna, Belarusun Rusiyanın tərəfində müharibəyə daha da cəlb oluna biləcəyi ilə bağlı narahatlıqlar fonunda şimal sərhədində müdafiəsini gücləndirir.

SİA xəbər verir ki, The Guardian qəzetinin məlumatına görə, Ukrayna-Belarus sərhədi boyunca müdafiə istehkamları artıq gücləndirilir və kəşfiyyat , sərhəd mühafizəçiləri sərhəd yaxınlığında qoşun, eləcə də dron fəaliyyətini yaxından izləyir.

Jurnalistlər izah ediblər ki, 2026-cı ilin əvvəlindən bəri Ukrayna ordusu Belarus ərazisindən fəaliyyət göstərən Rusiya kəşfiyyat dronlarının fəaliyyətində təxminən 20 faiz artım qeydə alıb.

Belarus sərhədi yaxınlığında yeni Rusiya dron bazalarının yaranması və potensial olaraq Rusiya əməliyyatlarını dəstəkləmək üçün istifadə edilə biləcək infrastrukturun genişləndirilməsi barədə də məlumatlar var.

Buna baxmayaraq, Ukrayna və Avropa analitikləri hələlik Belarusda Ukraynaya qarşı yeni hücum üçün zərbə qüvvələrinin yaradılmasına dair heç bir əlamət görmürlər. Eyni zamanda, onlar Minskin Rusiya hərbi maşınına tədricən inteqrasiyasına qarşı xəbərdarlıq edirlər.

Məqalənin müəllifləri vurğulayıblar ki, Ukrayna prezidenti Volodimir Zelenskiy və keçmiş xarici işlər naziri Dmitri Kuleba Belarus lideri Aleksandr Lukaşenkonun müharibədə daha aktiv rol oynamağa hazırlaşdığından şübhələnirlər.

Bu fonda Ukrayna şimal sektorunu tank əleyhinə maneələr, tikanlı məftillər və əlavə müşahidə avadanlıqları ilə gücləndirir.

Məqalədə qeyd olunur ki, Kiyev üçün əsas təhlükə Belarus ordusunun birbaşa döyüşə girməsində deyil, Belarusun Ukraynaya qarşı Rusiya əməliyyatları üçün sabit bir məkana çevrilməsindədir.

Ekspertlər həmçinin hesab edirlər ki, Kremlin strategiyası kəskin eskalasiya deyil, əksinə Belarusun müharibədəki rolunun tədricən genişləndirilməsi ola bilər ki, bu da Ukrayna və bütün region üçün əlavə təhlükəsizlik riskləri yaradacaq.

Əli Babayev