Bu ölkələr də Ukrayna üçün əlavə silahların alınmasını elan ediblər...

...Almaniya və Ukrayna ballistik raket əleyhinə hava hücumundan müdafiə sisteminin birgə inkişafı üçün zəmin yaradıblar.

SİA-nın əldə etdiyi məlumata görə, DW xəbər verir ki, Almaniyanın müdafiə naziri Boris Pistorius cümə axşamı Brüsseldə Ukrayna üzrə Təmas Qrupu və NATO müdafiə nazirlərinin görüşündə müvafiq sazişin imzalandığını elan edib.

O qeyd edib ki, "...bir neçə alman şirkəti bu layihəyə maraq göstərib. Bu, Avropa və Ukraynanın təhlükəsizliyinə mühüm töhfə verə bilər".

Eyni zamanda, alman nazir Ukraynanın yeniliklərinə və təcrübəsinə istinad edərək, bu cür əməkdaşlığın uzun müddətdir ki, birtərəfli olmadığını vurğulayıb.

Eyni zamanda, Pistorius Ukraynaya silah üçün əlavə 400 milyon dollar ayrıldığını elan edib.

Bu məbləğin yarısı (təxminən 174 milyon avroya bərabər) NATO və ABŞ prezidenti Donald Tramp arasında razılaşdırıldığı kimi, 2025-ci ilin yayından bəri qüvvədə olan Amerika silahlarının alınması üçün Purl (Ukraynanın Prioritet Tələbləri Siyahısı) mexanizmi çərçivəsində ayrılacaq.

Bundan əlavə, Berlin Patriot hava hücumundan müdafiə sistemi üçün idarə olunan raketlərin alınmasına 200 milyon dollar ayıracaq.

Pistoriusun sözlərinə görə, Ukrayna üzrə Təmas Qrupuna Birləşmiş Krallıqla birlikdə həmsədrlik edən Almaniya Kiyevə yeni hərbi yardımın göstərilməsində aparıcı rol oynayır.

"Bu addımla biz Ukraynanın müdafiəsi üzrə Təmas Qrupunun digər üzvlərini də PAC-3 idarə olunan raketlərinin alınmasının maliyyələşdirilməsində iştirak etməyə təşviq etmək istəyirik", - deyə o vurğulayıb.

Purl proqramı çərçivəsində NATO ölkələri və onların müttəfiqləri ABŞ-dan Ukrayna üçün hər biri 500 milyon dollar dəyərində silah paketləri ala bilərlər.

Almaniya əvvəllər üç belə paketin alınmasında iştirak edib. İsveç, Kanada, Norveç və Hollandiya da daxil olmaqla digər ölkələr də Rusiyanın hərbi təcavüzündən özünü müdafiə edən Ukrayna üçün əlavə silahların alınmasını elan ediblər.

Əli Babayev