The Times: Ukrayna Kremlin simvoluna zərbə endirdi…

...Rusiyanın nəzarətində olan Krımda, Ukraynanın Kerç boğazı yaxınlığındakı neft və nəqliyyat infrastrukturuna yeni zərbələr dalğasından sonra mülki şəxslərə və müəssisələrə yanacaq satışı tamamilə dayandırılıb. Yarımadadakı benzin və dizel yanacağı artıq yalnız həyat təminatı və təhlükəsizlikdən məsul olan dövlət qurumlarına satılır.

SİA-nın xarici qaynaqlardan əldə etdiyi məlumata görə, bu barədə Krımın Moskva tərəfindən təyin olunmuş rəhbəri Sergey Aksyonov bildirib.

Ukrayna tərəfinin məlumatına görə, bazar günü gecə Kerçdəki neft anbarı və Krasnodar ərazisindəki neft məhsullarının daşınması müəssisəsi zərbələrə məruz qalıb.

Hücum zamanı yarımadanı Rusiya ilə birləşdirən əsas nəqliyyat arteriyası olan Krım körpüsü müvəqqəti olaraq bağlanıb.

Ukrayna Prezidenti Volodimir Zelenski zərbələri Rusiya hücumlarına "ədalətli cavab" adlandırıb və hərbi logistika qurğularına və hava hücumundan müdafiə elementlərinə də zərbə endirildiyini bildirib.

Vəziyyət Ukraynanın Krımın təchizat yollarına sistematik hücumları ilə daha da ağırlaşır. Əvvəllər Rusiyanın cənubundan və Ukraynanın işğal olunmuş ərazilərindən yarımadaya yük daşıyan körpülər və magistral yolların hissələri zədələnib.

Nəticədə Kerç boğazı yolu təchizat üçün getdikcə daha vacib hala gəlir, lakin indi daim təzyiq altındadır. Bir neçə həftədir ki, yarımadada yanacaq çatışmazlığı yaranır.

Əvvəllər hakimiyyət yanacaqdoldurma məntəqələrində kuponlar və limitlər tətbiq edirdi. İndi məhdudiyyətlər daha da sərtləşib. Moskva üçün bu, təkcə logistika problemi deyil, həm də onun imicinə ağrılı zərbədir.

Kreml illərdir Krımı və Krım körpüsünü yarımada üzərində tam nəzarətinin simvolu kimi təsvir edir.

Əli Babayev