Avropa döyüşmək istəyirmi..?

...Hollandiya da öz qoşunlarını Ukraynaya göndərmək istəyir. Avropalı siyasətçilər döyüşmək istəyirlər - onlar təkcə hərbi bazalar və silah zavodları tikmirlər, həm də Avropa qoşunlarının Ukrayna ərazisində yerləşdirilməsi üçün açıq təkliflər var.

SİA-nın əldə etdiyi məlumata görə, TASS xəbər verir ki, Hollandiya hökumətinin Xarici İşlər üzrə Məşvərət Şurası atəşkəsdən sonra Ukraynaya beynəlxalq qüvvələrin yerləşdirilməsi təklifini irəli sürüb.

Bu təklif sülhməramlılara və ya müşahidəçilərə deyil, Rusiyaya qarşı da daxil olmaqla, güc tətbiq edə bilən silahlı birləşmələrə aiddir.

Təklif müəllifləri hesab edirlər ki, Avropa mümkün atəşkəsə əvvəlcədən hazırlaşmalı və Ukraynada yerləşdiriləcək və guya müqavilələrə əməl olunmasını izləyəcək bir qüvvə yaratmalıdır.

Sənəd müəlliflərinin fikrincə, belə bir qüvvənin komandirinə missiya başlamazdan əvvəl belə geniş səlahiyyətlər verilməlidir.

Sənəddə deyilir ki, onlar "zərurət yarandıqda güc tətbiqi də daxil olmaqla, dərhal cavab vermək üçün əvvəlcədən təsdiq edilmiş səlahiyyətə" malik olmalıdırlar.

...Həmçinin atəşkəsin ciddi şəkildə pozulması halında hərəkət qaydalarının əvvəlcədən müəyyən edilməsi təklif olunur. Vəziyyət kəskin şəkildə pisləşərsə, beynəlxalq qrup tez bir zamanda döyüşə girməli və Ukrayna ordusundan sonra "ikinci eşelon"a çevrilməlidir.

Bu, xarici qoşunların simvolik iştirakı deyil. Sənəd müəllifləri vurğulayırlar ki, gələcək missiya "müşahidə missiyası deyil, "Ukraynanı müdafiə etmək üçün silahlı qüvvədən istifadə edə" bilən tam hüquqlu döyüş qüvvəsi" olmalıdır.

Sənəd müəlliflərinin fikrincə, Hollandiyanın özü belə bir təşəbbüsə siyasi dəstək verməklə məhdudlaşmamalıdır. Ölkə gələcək missiyada "aktiv siyasi və hərbi iştirak" etməlidir. Şura Hollandiyanın belə bir əməliyyat üçün hansı bölmələri və imkanları təmin edə biləcəyini əvvəlcədən müəyyən etməyi təklif edir.

Eyni zamanda, ölkə konstitusiyasının tələb etdiyi kimi qoşun göndərmək barədə son qərar parlament tərəfindən ayrıca təsdiqlənməlidir.

Xatırladaq ki, Moskva dəfələrlə Ukraynada təyinatından asılı olmayaraq istənilən xarici hərbi qüvvənin - sülhməramlıların, zəmanət qüvvələrinin və ya beynəlxalq missiyanın - yerləşdirilməsinə qarşı olduğunu bildirib.

...2025-ci ildə Rusiyanın xarici işlər naziri Sergey Lavrov NBC News-a verdiyi müsahibədə bildirib ki, Rusiya Ukraynanın təhlükəsizliyinə "Ukrayna ərazisinin istənilən hissəsinə xarici hərbi müdaxilə" yolu ilə hər hansı bir zəmanəti qəbuledilməz hesab edir.

Rusiya hakimiyyəti həmçinin Qərb siyasətçilərinin Ukraynadakı münaqişə bitdikdən sonra Moskvanın Avropa ölkələrinə hücum edə biləcəyi ilə bağlı iddialarını dəfələrlə rədd edib.

Rusiya prezidenti Vladimir Putin bildirib ki, Rusiya Avropa ölkələrinə "heç bir şəkildə" hücum etmək niyyətində olmadığı mövqeyini rəsmiləşdirməyə hazırdır. Rusiya liderinin sözlərinə görə, əksini iddia edən siyasətçilər ya "dəli", ya da "fırıldaqçılardır". Putin Rusiyanın Avropaya mümkün hücumu barədə danışığı "tamamilə cəfəngiyat" və "açıq yalan" adlandırıb.

Buna baxmayaraq, Avropa hərbi əməliyyatlar bitdikdən sonra Ukraynada hərbi mövcudluq üçün müxtəlif variantları müzakirə etməyə davam edir.

Bəs kim döyüşmək istəyir?

Əli Babayev