Almanların əksəriyyəti imkanı olsaydı, pulsuz işləyərdi...

...Almanların əksəriyyəti (61 faizi) gəlirə ehtiyac duymasalar belə, işləməyə davam edəcəklər.

SİA-nın əldə etdiyi məlumata görə bu, INSA ictimai rəy tədqiqat institutu tərəfindən aparılan bir araşdırmada aşkar edilib.

KNA xəbər agentliyi sorğunun nəticələrini 3 iyulda açıqlayıb. Bu barədə Deutsche Welle xəbər verir.

Eyni zamanda, respondentlərin 27 faizi aylıq maaşları olmadan yaşaya bilsələr, işləməyəcəklərini etiraf edib

Digər 12 faiz isə qərarsız qalıb. Tədqiqat müəlliflərinin qeyd etdiyi kimi, işləməyə davam etmək istəyi yaşdan, cinsdən, yaşayış bölgəsindən, gəlir səviyyəsindən və ya siyasi meyllərdən asılı deyil.

Bütün sosial-demoqrafik qruplarda respondentlərin əksəriyyəti işlərindən imtina etməyəcəklərini bildirib. Təmsilçi sorğuya 1119 Almaniya sakini daxil olub.

İş etikası ilə bağlı müzakirələr fonunda Almaniyada iş etikası, iş saatları və iş-həyat balansı ilə bağlı müzakirələr davam edir.

Almaniya kansleri Fridrix Merz və biznes liderləri iqtisadiyyatı dəstəkləmək və işçi qüvvəsi çatışmazlığını aradan qaldırmaq üçün işçi qüvvəsi məhsuldarlığının artırılmasının vacibliyini dəfələrlə bildiriblər.

Kansler almanları tez-tez xəstəlik məzuniyyətinə çıxdıqlarına və onun fikrincə, işləmək üçün kifayət qədər motivasiyaya malik olmadıqlarına görə tənqid edib.

Yeni bir araşdırmanın nəticələri göstərir ki, əksər insanlar üçün iş təkcə gəlir mənbəyi deyil, həm də özlüyündə bir dəyər olaraq qalır.

Əli Babayev