Peru seçkilərində müxalifətin namizədi liderlik edir

"Assoşieyted Press" informasiya agentliyinin yaydığı məlumata görə, Peruda keçirilən prezident seçkilərində keçmiş hərbçi olan müxalifət namizədi Olyanta Umala liderlik etməkdədir. "Exit-poll"un nəticələri bu faktı təsdiq etməkdədir. Solçuluq mövqeyindən çıxış edən istefada olan podpolkovnik O.Umala ölkənin təbii ehtiyatlarının bölünməsi fikrinə üstünlük verir. Seçkilərdə onu dəstəkləyənlərin miqdarı 31-34 faiz arasındadır. Politoloqların proqnozlarına görə, O.Umalanın ən yaxın iki rəqibi ikinci-üçüncü yerləri bölüşürlər. Peruda prezident seçkilərinin birinci turu aprelin 10-da keçirilmişdir. Belə ehtimal edilir ki, ölkə prezidentinin adı iyunun 5-də keçiriləcək ikinci turda müəyyən ediləcəkdir. O.Umala prezident seçkilərinə 2006-cı ildə qoşulmuşdur. O vaxt o, ilk turda birinci yerə çıxsa da, ikinci turda 6 faiz səs fərqi ilə hazırda iqtidarda olan Peru prezidenti Alanu Qarsiyaya məğlub olmuşdur. "Frans Press" agentliyinin yaydığı məlumata görə, aprelin 10-da Peruda keçirilən prezident seçkilərində iştirak edən beynəlxalq müşahidəçilər ciddi qanun pozuntusu müşahidə edilmədiyini bildirmişlər.