Alzeymerlə bağlı yeni beyin xəritələri hazırlanıb

ABŞ Milli Sağlamlıq İnstitutunun (NIH) dəstəklədiyi alimlər Alzeymer xəstəliyi və digər beyin xəstəlikləri ilə əlaqəli molekulyar prosesləri daha detallı göstərən yüksək dəqiqlikli xəritələr hazırlayıblar.

Tədqiqatçılar 1 494 donorun beyin toxumasından 6,3 milyondan çox hüceyrə nüvəsini analiz ediblər. Bu, Alzeymer xəstəliyi zamanı beyində hansı hüceyrələrin və molekulyar proseslərin dəyişdiyini daha ətraflı müəyyənləşdirməyə imkan verib.

Araşdırma zamanı Alzeymer xəstəliyinə xas dəyişikliklərlə yanaşı, digər neyrodegenerativ xəstəliklərdə də müşahidə olunan ümumi molekulyar xüsusiyyətlər müəyyən edilib. Alimlər hesab edirlər ki, əldə olunan məlumatlar xəstəliyin inkişaf mexanizmlərinin daha yaxşı öyrənilməsinə, yeni diaqnostika üsullarının və müalicə hədəflərinin müəyyənləşdirilməsinə kömək edə bilər.

Tədqiqatın nəticələri alimlər üçün beyin xəstəliklərinin hüceyrə səviyyəsində öyrənilməsi baxımından geniş məlumat bazası yaradır.

Lalə Mehralı