Yaponiyanın baş naziri istefa verib

"Frans Press" informasiya agentliyinin yaydığı məlumata görə, iyunun 2-də Yaponiyanın baş naziri Yukio Xatoyama başçılıq etdiyi Yaponiya Demokratik Partiyasının (YDP) rəhbərliyinə istefaya çıxmaq istədiyini bəyan etmişdir. O öz addımını, ABŞ-ın Okinava adasındakı Futenme hərbi aviasiya bazasını çıxaracağı haqda seçkiönü vədini yerinə yetirmədiyi üçün xalqın etimadsızlığı ilə əlaqələndirmişdir. Baş nazirin bəyanatı iyunun 2-də parlamentin hər iki palatasının yığıncağında müzakirə edilmişdir. Y.Xatoyama Yaponiyanın baş naziri postuna 2009-cu ilin sentyabrında seçilmişdir. O vaxt onu seçicilərin 70 faizi dəstəkləyirdi. Ötən 9 ay ərzində baş nazirin reytinqi 70 faizdən 20 faizə enmişdir. Y.Xatoyama 2009-cu ilin noyabrında ABŞ prezidenti Barak Obama ilə apardığı danışıqlarda xalqa verdiyi vədinə xilaf çıxacaq qərar qəbul etmişdir. Nəticədə, mayın 28-də ABŞ aviabazası adanın başqa bölgəsinə göndərilmişdir. Bu qərarından sonra, bəzi iqtidar nümayəndələrində, Y.Xatoyamaya münasibətdə radikal dəyişikliklər müşahidə edilmişdir. Bu da baş nazirin iqtidar koalisiyasının dəstəyindən məhrum olması ilə nəticələnmişdir.