Misirin xüsusi xidmət orqanı əməkdaşları islamçı liderləri həbs ediblər

"Röyter" informasiya agentliyinin yaydığı məlumata görə, Misirin xüsusi xidmət orqanı əməkdaşları fevralın 8-də səhər keçirdikləri reyddə müxalifətçi "Müsəlman Qardaşlığı" təşkilatının 14 yüksək vəzifəli üzvünü həbs etmişlər. Reyd təşkilat lideri Mahmud İzzətin müavini Essam əl-Erianın və digər islamçı liderlərin evində keçirilmişdir. İlkin məlumata görə, 20 nəfərə yaxın təşkilat üzvü həbs edilmişdir. "Müsəlman Qardaşlığı" reydin 2012-ci il parlament seçkiləri öncəsi hakimiyyətin xal yığmaq məqsədi ilə keçirdiyini bildirir. Misirdə "Müsəlman Qardaşlığı" təşkilatının fəaliyyəti 1954-cü ildə qadağan edilmişdi. Həmin ildə qardaşlıq üzvləri ölkə prezidenti Qamal Əbdel Naserə uğursuz sui-qəsd cəhdi etmişlər. Statusunun qeyri-leqallığına baxmayaraq, təşkilat fəal siyasi müxalifət mövqeyi tutur və seçkilərdə iştirak edərək, öz müstəqil namizədlərini irəli sürür. 2005-ci ildə "Müsəlman Qardaşlığı" parlamentdəki yerlərin beşdə birini tutmağa nail olmuşdu. Misirdə bu islamçı təşkilat qısa vaxt ərzində minlərlə tərəfdarını etiraz aksiyalarına toplaya bilir. Bununla da ölkə rəhbərliyində ciddi narahatlıq doğurur.