Sonuncu İtaliya kralının oğlu müttəhimlər kürsüsündə əyləşdiriləcək

"Assoşieyted Press" informasiya agentliyinin yaydığı məlumata görə, İtaliyanın sonuncu kralının oğlu şahzadə Viktor Emmanuil yenidən müttəhimlər kürsüsündə əyləşdiriləcəkdir. Romanın hüquq-mühafizə orqanı əməkdaşları məlumatın doğruluğunu təsdiq etmişlər.
72 yaşlı şahzadə qeyri-qanuni oyun biznesində, sutenyorluqda və cinayətkar qruplaşmada iştirak etməkdə ittiham edilir. Viktor Emmanuilin ilk məhkəmə dinləmələri cari ilin 21 dekabrına təyin edilmişdir.
2006-cı ilin iyununda V.Emmanuil üzərinə analoji ittihamlar irəli sürülmüşdür. O zaman şahzadə bir həftə nəzarət altında saxlanıldıqdan sonra ev dustağı qismində azadlığa buraxılmışdır. 2006-cı ilin iyulunda isə şahzadə üçün ev dustaqlığı ölkə ərazisini tərk etməməklə əvəz edilmişdir. Beş ay sonra isə hər cür məhdudlaşdırılmalar və yerdəyişmələr şahzadənin üzərindən götürülmüşdür. O vaxtdan etibarən cinayət işi bağlanmamışdır.