Qondurasın müvəqqəti dövlət başçısı istefaya çıxmağa hazır olduğunu bildirib

"Assoşieyted Press" informasiya agentliyinin yaydığı məlumata görə, müvəqqəti olaraq Qondurasın prezidenti səlahiyyətlərini icra edən Roberto Miçeletti iyulun 15-də belə bir bəyanat vermişdi ki, hakimiyyətdən uzaqlaşdırılmış Manuel Selayya ölkəyə qayıtmaq niyyətindən imtina edərsə, o, tutduğu postdan istefa verməyə hazırdır. İyulun 14-də R.Miçeletti iyulun 18-də Kosta-Rikada M.Selayya ilə danışıqlar aparmağa hazır olduğunu bildirmişdir.
İyulun 9-da Kosta-Rikada keçirilmiş danışıqların birinci raundunda R.Miçeletti və M.Selayya öz aralarında görüş keçirməkdən imtina etmişlər. İyulun 15-də M.Selayya Qonduras əhalisini üsyana çağırmışdır. O, iyunun 28-də tutduğu prezident postundan uzaqlaşdırılaraq, təyyarə ilə Kosta-Rikaya aparılmışdır.
ABŞ, Avropa Birliyi və Latın Amerikası ölkələri Qondurasdakı hərbi çevrilişi ittiham etmiş və Qondurasın Amerika Dövlətləri Təşkilatındakı fəaliyyətini müvəqqəti olaraq dondurmuşdur.