Türkiyədə Obamanın həyatına qəsd etmək istəyən əlibıçaqlı adam tutulub

"Assoşieyted Press" informasiya agentliyinin yaydığı məlumata görə, İstanbulda ABŞ prezidenti Barak Obamanın həyatına edilə biləcək sui-qəsd aradan qaldırılmışdır. B.Obama Türkiyədə iki günlük səfərdə olarkən polis əlibıçaqlı bir nəfəri həbs etmişdir. Həmin şəxsin dediyinə görə, o, ABŞ prezidentini öldürmək niyyətində olmuşdur. B.Obama İstanbulda 5-7 apreldə rəsmi səfərdə olmuşdur. Əlibıçaqlı şəxs aprelin 5-də həbs edilmişdir. ABŞ xüsusi xidmət idarəsinin nümayəndəsi Ed Donovanın dediyinə görə, prezidentin həyatını təhdid edəcək hər hansı təhlükə baş verməmişdir. Həbs edilmiş şəxsin ruhi xəstə olduğu müəyyən edilib buraxılmışdır. Sorğu-sual zamanı həbs edilmiş şəxs üç köməkçisinin olduğunu bildirmişdir. Həmin gün "Əl-Kaidə" terrorçu qruplaşmasının üç üzvü həbs edilmişdir. Polis onların sui-qəsdə əlaqələrinin olub-olmamasını araşdırır.