BMT Benəzir Bhuttonun qətlinin təhqiqatı üzrə komissiya yaradıb

"Assoşieyted Press" informasiya agentliyinin yaydığı məlumata görə, BMT Pakistanın keçmiş baş naziri Benəzir Bhuttonun qətlinin təhqiqatı üzrə komissiya yaratmışdır. Yanvarın 3-də komissiyanın yaradılması haqda məlumatı Pakistan prezidenti Asif Əli Zərdariyə BMT-nin baş katibi Pan Gi Mun vermişdir. Əli Zərdari əmin olduğunu bildirmişdir ki, komissiya terror aktının təşkilatçılarını müəyyənləşdirib, ədalət məhkəməsinə təqdim edəcəkdir.

Benəzir Bhutto 2007-ci ilin 27 dekabrında Ravalpindi şəhərində terror aktı nəticəsində qətlə yetirilmişdir. Pakistanın keçmiş prezidenti Pərviz Müşərrəf B.Bhuttonun qətlində "Əl-Kaidə" ilə əlaqəli olan radikal islamçıları ittiham etmişdir. Pakistan müxalifəti isə keçmiş baş nazirin qətlində xüsusi xidmət orqanlarının əli olduğunu bildirmişdir. P.Müşərrəfin vaxtında B.Bhuttonun qətli ilə əlaqədar 4 nəfər həbs edilmişdir.