“İzvestiya” qəzeti Azərbaycandan xahiş edib ki, jurnalist Yuri Snegiryovu “qara siyahı”dan çıxarsın

"İzvestiya" qəzeti redaksiyası Rusiyadakı Azərbaycan səfirliyinə rəsmi məktubla müraciət edərək, persona non-qrata elan edilmiş jurnalist Yuri Snegiryovun "qara siyahı"dan çıxarılmasını xahiş etmişdir. İyunun 1-də Azərbaycanın Xarici İşlər Nazirliyinin rəsmi nümayəndəsi Elxan Poluxov "İzvestiya" qəzetinin müxbiri Y.Snegiryovun Azərbaycana girişinin qadağan edildiyini bəyan etmişdir. Qadağanın səbəbi Y.Snegiryovun Dağlıq Qarabağda reportaj hazırlaması olmuşdur. "Qarabağda müharibə gözləmirlər, ancaq ona hazırlaşırlar" adlı məqalədə Xankəndinin Stepanakert adlandırılması rəsmi Bakının xoşuna gəlməmişdir. Azərbaycan XİN məqalənin bütövlükdə "birtərəfli" tərzdə qələmə alındığını bildirmişdir.