Venesuelada 27 gün davam edən həbsxana üsyanı yatırılıb

"Frans Press" informasiya agentliyinin ölkənin Daxili İşlər Nazirliyinə əsaslanaraq, yaydığı məlumata görə, Venesuela polisi 27 gün ərzində "El-Rodeo" həbsxanasında davam edən məhbusların üsyanını boğaraq, nəzarəti öz üzərlərinə götürmüşlər. Venesuela xarici işlər naziri Tarek El-Aissami hadisəni bu cür şərh etmişdir: "Sevinc hissi ilə demək istəyirəm ki, "El-Rodeo" həbsxanasında baş vermiş üsyan 30-a yaxın məhbusun öldürülməsi ilə başa çatmışdır. Üsyanı dinc yolla yatırmaq mümkün olmuşdur."

"BBC Nyus"un məlumatına görə, "El-Rodeo" həbsxanasından 800 nəfərdən çox məhbus çıxarılmışdır. Onlar üzərində tibbi nəzarət başa çatdıqdan sonra hamısı iki yerə bölünərək, iki başqa-başqa həbsxanalara aparılacaqlar. "El-Rodeo" həbsxanasının strukturu üsyan nəticəsində dağıdıldığına görə, burada bərpa işləri aparılacaqdır.

Ölkənin şimalında Miranda ştatında yerləşən "El-Rodeo" həbsxanasında üsyan iyunun 12-də başlanmışdır. Bir qrup məhbus bir neçə yüz adamı girov götürərək, onları hakimiyyət dairələrinə təslim olmaqdan çəkindirirdi. Məhbuslarda avtomat silahlar və qumbaralar olduğu üçün üsyanı yatırmaq çətinləşmişdi. Üsyançılara qarşı 4 min nəfər milli qvardiya döyüşçüsü cəlb edilmişdir. Üsyan qvardiyaçıların hücumu nəticəsində yatırılmışdır.

14 min nəfər məhbus üçün nəzərdə tutulan bu həbsxanada 50 min nəfər saxlanılırdı.