Türkiyədə zəlzələdən həlak olanların sayı artmaqdadır

"Frans Press" informasiya agentliyinin yaydığı məlumata görə, Türkiəyədə zəlzələdən həlak olanların sayı 459 nəfərə çatıb. 1350 nəfər bədən xəsarəti alıb. Oktyabrın 25-də uçqunlar altından 10 yaşlı uşaq çıxarılıb. Oktyabrın 26-də Türkiyənin cənubi-şərqində yerləşən Erkis şəhərində uçqunlar altından 27 yaşlı qadın çıxarılıb.

"Assoşieyted Press" burada dağıntılar altından 18 yaşlı tələbə Əyyub Erdemin çıxarılaraq xəstəxanaya göndərildiyini xəbər verir. Son gün, ərzində xilasedicilər 40-dək adam çıxarıblar. Sağ çıxarılanlar arasında iki sutka uçqunlar altında olan iki yaşlı qız uşağı da olub. Qızın anası və nənəsi də xilas edilib.

Oktyabrın 26-da Van şəhərinin həbsxanasında yeraltı təkanların davam etməsindən narahat olan məhbuslar üsyan qaldırmışlar. "Assoşieyted Press" həbsxana ətrafına əlavə təhlükəsizlik qüvvələrinin gətirildiyini bildirir.

Türkiyə hökuməti İsrail də daxil olmaqla 30-dək ölkədən yardım istəyib. Hakimiyyət dairələri İsrailin ev-eşiksiz qalan adamlar üçün təkərli evlər göndərməsini xahiş ediblər. İsraildən ilk təyyarə oktyabrın 26-da Türkiyəyə uçub.