Vladimir Putin seçki kampaniyası aparır

Rusiya baş naziri Vladimir Putin üçüncü dönəm prezidentlik uğrunda kampaniyasını davam etdirir. Bu arada müxalifət tərəfdarları onun namizədlyinə qarşı aksiya keçiriblər. Milli.Az "Amerikanın səsi"nə istinadən bildirir ki, "Başqa Rusiya" adlı müxalifət qrupunun nümayəndələri anti-Putin şüarlar səsləndiriblər. Onlar "Biz diktaturanı dayandıracağıq!" və "Rusiya azad olacaq!" kimi şüarlar hayqırıblar. Ruslar dekabrda keçirilən parlament seçkilərindən bəri etiraz aksiyaları keçirirlər. Müxalifət hakim partiyanı seçkiləri saxtalaşdırmaqda ittiham edir. Vladimir Putin dünən kampaniya təmsilçiləri ilə görüşüb və qurultay zalında vətəndaşların suallarını cavablandırıb. O, deyib ki, saxtakarlıqda ittiham olunan rəsmiləri avtomatik olaraq işdən çıxarmayacaq.