Bəşər Əsəd: "Öz ideologiyamızdan əl çəkməyəcəyik"

Suriya prezidenti Bəşər Əsəd öz xalqını münaqişəyə son vermək üçün birləşməyə və xalq hərəkatı yaratmağa çağırıb, lakin bu planın təfərrüatlarını açıqlamayıb.

"Mən ölkədəki vəziyyətin diplomatik yolla həllini gözləyə bilmərəm. Suriya heç kimin diqtəsini qəbul etməyəcək. Biz öz prinsiplərimizdən və ideologiyamızdan əl çəkməyəcəyik. Bu ideologiya isə bizə təslim olmamağı, geri çəkilməməyi öyrədir. Suriya gözlənilməz bir hücuma məruz qalıb və bu münaqişə yalnız xalq hərəkatı vasitəsilə öz həllini tapa bilər. Bütün suriyalıları 22 aydır davam edən bu münaqişəni sona çatdırmaq üçün təşəbbüsdə iştirak etməyə çağırıram", - deyə o vurğulayıb.

Suriya prezidenti həmçinin ölkəsinin bölünməsini istəməyən hər kəslə dialoqa hazır olduğunu vurğulayıb. Əsəd çıxışının sonunda parçalanmış müxalifəti də tənqid edib. Bəşər Əsədin çıxışından sonra tərəfdarları onu əhatəyə alaraq, "Biz səni müdafiə edəcəyik!" şüarını səsləndiriblər.

sia.az