Fransada binanın uçması nəticəsində 5 nəfər həyatını itirmişdir

Fransanın Reyms şəhərində qaz sızması nəticəsində yaşayış binasında güclü partlayış olmuşdur. Hadisə yerinə gələn xilasedicilər və yanğınsöndürənlər dağılmış binanın uçuqları arasından beş nəfərin meyidini və 14 yaralı çıxarmışlar. Yaralılar xəstəxanaya yerləşdirilmişdir. Onlardan 4-nün vəziyyətinin ağır olduğu bildirilir. Dörd nəfər sakin isə itkin düşmüşdür. Onların axtarışı hələlik bir nəticə verməmişdir.

Hadisə bazar günü cübh tezdən baş vermişdir. Binadakı mənzillərin birində qaz sızması bədbəxt hadisəyə səbəb olmuşdur. Bina tamamilə yararsız vəziyyətə düşmüşdür.

Ölkə başçısı Fransua Olland hadisəni faciə adlandırmış və həlak olanların ailələrinə və yaxınlarına başsağlığı vermişdir.

AzərTAc