Səfir İsrail ordusunun Qarabağda olması xəbərini "böyük axmaqlıq" adlandırıb

İsrailin Rusiyadakı səfiri Aleksander Ben Svi, İsrail hərbçilərinin Qarabağda olduğu iddia edilən xəbərləri "böyük axmaqlıq" və fantaziyalar adlandırıb. SİA xəbər verir ki, bunu səfir jurnalistlərin əlaqədar sualını cavablandırarkən ifadə edib.

"Düşünürəm ki, bu böyük bir axmaqlıqdır, çünki Dağlıq Qarabağ bölgəsindən danışırıqsa, orada həm rus, həm də türk hərbçilər var. Buna görə də düşünürəm ki, bəzi fantaziyalara sahib olanlar bunu deyə bilərlər. Güman edirəm ki, əgər onlarda belə fantaziyalar varsa, hətta Marslıların da orada olmasını deyərlər", deyə səfir bildirib.

Qeyd edək ki, bu barədə Rusiyaya məxsus RİA Novosti Agentliyində də məlumat yayımlanıb. Sonda isə xatırladılıb ki, 2020-ci ilin sentyabr ayının sonunda Dağlıq Qarabağda uzunmüddətli münaqişənin davamı olan və mülki əhali arasında itkilərə səbəb olan hərbi əməliyyatlar yenidən başlayıb. Tərəflər barışıq əldə etmək üçün bir neçə cəhd ediblər, lakin 10 noyabr gecəsi əldə edilən üçtərəfli razılaşmanın uğurlu olduğu ortaya çıxıb. Moskvanın vasitəçiliyi ilə Azərbaycan və Ermənistan atəşi tamamilə dayandırmaq və əsirləri, eləcə də ölülərin cəsədlərini dəyişdirmək barədə razılığa gəliblər. Həmçinin, xüsusən də, İrəvan müharibələrarası dövrdə tanınmamış, qondarma Dağlıq Qarabağ Respublikasının nəzarəti altında olan Kəlbəcər və Laçın bölgələrini, eləcə də Ağdam rayonunun bir hissəsini Azərbaycana müqavimət göstərmədən təhvil verib. Bundan əlavə, bölgədə rusiyalı sülhməramlılar yerləşdirilib.