İrəvanda yeni doğulan körpə koronavirusdan ölüb

İrəvanda reanimasiya şöbəsində olan koronavirusa yoluxmuş bir aylıq uşaq ölüb. SİA xəbər verir ki, bu barədə İrəvan Dövlət Tibb Universitetinin nümayəndəsi Şuşan Danielyan cümə günü Facebook-da yazıb.

"Bir aylıq körpənin bioloji ölümü bu gün səhər Muratsan Universiteti Xəstəxanasının neonatal reanimasiya və reanimasiya şöbəsində qeydə alınıb", deyə Danielyan bildirib.

Onun sözlərinə görə, körpə oktyabrın 19-da xəstəxanaya aparılıb, oktyabrın 26-da isə süni nəfəs aparatına qoşulub. "Uşaqda koronavirus infeksiyası var idi", deyə qeyd edib Danielyan.

Xatırladaq ki, oktyabrın 29-u tarixinə qədər Ermənistanda 304 546 COVID-19 infeksiyasına yoluxma halı təsdiqlənib, 6 232 nəfər isə ölüb. COVID-19-a qarşı mübarizə çərçivəsində dekabrın 20-dək ölkədə karantin elan edilib. Respublikanın ümumi əhalisi 2,9 milyon nəfəri ötüb, hakimiyyətin elan etdiyi məqsəd ilin sonuna qədər 700 minə yaxın insanı koronavirusa qarşı peyvənd etməkdir.