Hindistan yeni nəsil ballistik raketi sınaqdan keçirib

Hindistan nüvə yükü daşıya bilən yeni nəsil ballistik raketi Agni P-ni uğurla sınaqdan keçirib. SİA xəbər verir ki, bu barədə Hindistanın müdafiə nazirliyi məlumat yayıb.

Sınaq səhər saatlarında Benqal körfəzindəki Abdul Kalam adasından həyata keçirilib. Uçuşun bütün mərhələlərində raketin trayektoriyası və parametrləri telemetriya, radar, elektro-optik stansiyalar və uzaq mənzilli gəmilər tərəfindən izlənilib.

"Raket verilmiş trayektoriya üzrə gedib, bütün uçuş tapşırıqlarını yüksək dəqiqliklə yerinə yetirib. Agni P iki pilləli bərk yanacaq ballistik raketidir, ikiqat ehtiyat naviqasiya və istiqamətləndirmə sisteminə malikdir. Bu ikinci uçuş sınağı inteqrasiya olunmuş bütün qabaqcıl texnologiyaların etibarlılığını təsdiqləyib", deyə Hindistan Müdafiə Nazirliyinin məlumatında bildirilir.