Dünya

  • 497

Ukrayna çörəksiz qala bilər QAZIN BAHALAŞMASI SƏBƏBİNDƏN

image

Ukraynada çörək istehsalçıları qazın qiymətinin artması ilə əlaqədar sənayedə fəlakətli vəziyyətin olduğunu açıqlayıb. SİA xarici mətbuata istinadən xəbər verir ki, bir çox müəssisələr artıq bağlanmaq ərəfəsindədir.

Diqqətə çatdıraq ki, dekabrın 30-da Ukrayna Nazirlər Kabineti kərə yağı və çörəyin də daxil olduğu bəzi malların istehsalçıları üçün qazın qiymətlərinin artmasını məhdudlaşdıran qərar qəbul edib. ÜmumUkrayna Çörəkçilər Assosiasiyasının nümayəndələri bildiriblər ki, qaz tədarükçüləri bu qətnamənin şərtlərinə əməl etmir və qazı güzəştli qiymətlərlə satmırlar.

Çörəkçilər Ukrayna lideri Vladimir Zelenskiyə məktub yazaraq hökumətin fərmanından istifadə edə bilmədikləri üçün bizneslərin hər gün milyonlarla qrivna itirdiyini bildiriblər.

"Müəssisələrin fəaliyyətini təmin edə bilməyəcəyimiz və istehsalı dayandırmaq məcburiyyətində qalacağımız günə yaxınlaşırıq. Vurğulayırıq ki, təhlükəsizlik marjası tükənib, bir çox çörək istehsalı müəssisələri dayanmaq ərəfəsindədir", deyə məktubda bildirilir.

Eyni zamanda, “Ukrxlebprom” assosiasiyasının rəhbəri Aleksandr Vasilçenko bildirib ki, Ukrayna hakimiyyəti bu problemi nəzərdən qaçırmamalıdır, çünki onların məhsulları sosial əhəmiyyət kəsb edir və hərəkətsizlik ciddi nəticələrə səbəb ola bilər.

Xatırladaq ki, bir qədər əvvəl Ukraynada qazın bahalaşması ilə əlaqədar ərzaq məhsullarının bahalaşdığı bildirilirdi. Zelenskinin ofisi hətta ölkədə qida kartlarının tətbiqi imkanını nəzərdən keçirməyə başlayıb.

Digər xəbərlər