BMT: “Ukraynada 1081 mülki şəxs ölüb”

Rusiyanın Ukraynada keçirdiyi hərbi əməliyyatlar başlayandan bəri 2 788 dinc sakin zərər çəkib, 1 081 mülki şəxs isə həlak olub.

SİA əldə etdiyi məlumata istinadən xəbər verir ki, bu barədə cümə günü BMT-nin İnsan Hüquqları üzrə Ali Komissarlığı (UNHCHR) məlumat yayıb.

“UNHCHR hesab edir ki, real rəqəmlər daha çoxdur, xüsusilə də hökumətin nəzarətində olan ərazilərdə və xüsusən də son günlərdə, çünki intensiv döyüşlərin getdiyi bəzi yerlərdən gələn məlumatlar gecikir, bir çox məlumat isə hələ də təsdiqini gözləyir”, – sənəddə qeyd olunub.

Bildirilib ki, bu, məsələn, Mariupol və Volnovaxaya (Donetsk vilayəti), İzyuma (Xarkov vilayəti), Severodonetsk və Rubijneyə (Luqansk vilayəti), Trostyanetskə (Sumı vilayəti) aiddir, çünki bu yerlərdən dinc əhali arasında çoxsaylı itkilər olması barədə məlumatlar gəlir və bu məlumatlar hələ əlavə yoxlamadan keçir və yuxarıda göstərilən statistikaya daxil edilməyib.

“Mülki əhali arasında ölüm və ya yaralanmaların əksəriyyətinin səbəbi geniş təsir sahəsinə malik partlayıcılardan istifadədir, o cümlədən ağır artilleriya və çoxsaylı reaktiv yaylım atəşi sistemləri, həmçinin raket və hava zərbələri nəticəsində baş verib”, – icmalda deyilir.

BMT-nin təsdiqlənmiş məlumatlarına görə, 219 kişi, 165 qadın, 30 oğlan uşağı və 15 qız uşağı ölüb, 48 uşaq və 604 yetkin şəxsin cinsiyyəti hələ müəyyən edilməyib.