Azərbaycan mövqeyini diplomatiya və davamlı inkişafla möhkəmləndirir - ŞƏRH

“Prezident İlham Əliyev 80‑ci BMT Baş Assambleya sessiyasında – beynəlxalq tribundan çıxış edərək – Azərbaycanın keçdiyi çətin yol, əldə etdiyi nailiyyətlər və gələcək hədəflər barədə dünya ictimaiyyətinə müraciət etdi. O, çıxışına ənənəvi olaraq, uzun illər ərzində Azərbaycana qarşı törədilən işğal, insan hüquqları pozuntuları və ədalətsizliklər barədə xatırlatmalarla başladı, lakin bu dəfə əsas vurgu “qələbə və sülhə doğru dönüş” kimi təqdim olunan yeni mərhələyə yönəlmişdi. Prezidentin çıxışı eyni zamanda Azərbaycanın regionda transformasiya edən rolu, beynəlxalq əməkdaşlıq və davamlı inkişaf məsələlərinə dair strateji baxışını da əks etdirdi”. Bunu açıqlamasında Milli Məclisin üzvü Aydın Hüseynov deyib.

Deputat qeyd edib ki, Prezident İlham Əliyev çıxışı zamanı müharibənin Azərbaycan üçün yalnız hərbi yox, həm də hüquqi və siyasi platformada dönüş nöqtəsi olub: “İşğaldan azad edilmiş bölgələrdə infrastruktur tamamilə dağılmış, şəhər və kəndlər viran qoyulmuşdu. Prezident bu yerlərin yenidən qurulmasının prioritet layihə olduğunu bildirdi. “Böyük Qayıdış Proqramı” çərçivəsində artıq on minlərlə insanın həmin ərazilərdə yaşayışa, işə, təhsilə qayıtdığı vurğulandı. Lakin minalanma problemi hələ də ağır bir çağırışdır: 2020-ci ildən etibarən 400-dən çox Azərbaycan vətəndaşı və hərbi qulluqçu minalar səbəbindən həlak olmuş və ya ağır yaralanmışdır. Həmçinin 1990‑cı illərdənindəridən itkin düşmüş əcnəbi şəxslərin taleyi və həmin şəhidlərin ailələrinin hüquqları məsələsi diqqətə alınmalı olan vacib məsələlərdən biri kimi göstərilib. Bu məqamda Prezident Əliyev beynəlxalq ictimaiyyəti minaların zərərsizləşdirilməsi və itkin düşənlərlə bağlı məsələlərin humanitar və hüquqi çərçivədə həllinə dəvət etdi. Prezident çıxışında təkcə regional və milli məsələlərlə kifayətlənmədi, həm də beynəlxalq gündəm mövzularına toxundu. O bildirdi ki, dünyanın üzləşdiyi çağırışlara — iqlim dəyişikliyi, enerji təhlükəsizliyi, dayanıqlı inkişaf – cavab “inklyuziv, ədalətli və universal” yanaşma əsasında verilməlidir. Azərbaycan əvvəlki ildə COP29-a ev sahibliyi etmiş və orada “Bakı maliyyə məqsədi” (“Baku Finance Goal”) adlanan yeni kolektiv maliyyə hədəfini təqdim etmişdir — inkişaf etməkdə olan ölkələr üçün iqlim maliyyəsi səviyyəsinin 300 milyard ABŞ dollarına qədər çıxarılması məqsədi qoyulub. BMT-nin Paris sazişi çərçivəsində karbon bazarlarının tənzimlənməsi üzrə mexanizmlər üzərində işlər tamamlanmış və iqlim zərərləri fondu üzrə razılaşmalar imzalanmışdır. Prezidentin çıxışı strateji məzmuna malik idi. Bu, həm daxili auditoriya, həm də beynəlxalq ictimaiyyət üçün mesaj idi. Azərbaycan artıq mövqeyini yalnız müdafiə mövqelərlə deyil, həm də diplomatiya və davamlı inkişafla qurmaqdadır”.