“Azərbaycan gələcəkdə neft emalının inkişafına 20 milyard dollara yaxın sərmayə yatırmaq niyyətindədir”

Azərbaycan gələcəkdə neft emalının inkişafı üçün bu sahəyə 20 milyard dollara yaxın sərmayə yatırmaq niyyətindədir. Bunu "Azərbaycanın dövlət müstəqilliyi: sənaye-energetika kompleksi yeni zirvələrə doğru" mövzusunda Bakıda keçirilən "dəyirmi masa"da sənaye və energetika naziri Natiq Əliyev bildirmişdir.

Onun sözlərinə görə, müstəqilliyin bərpa edilməsindən sonra Azərbaycanın neft-qaz sektoru böyük yüksəlişə nail olmuş, bütün sahələrdə, eləcə də neft və qaz hasilatı, emal, kimya istehsalında inkişaf müşahidə edilmişdir.

Hazırda ölkənin neftayırma sahəsinin inkişafına dair yeni proqram hazırlanır. 1990-cı illərin əvvəllərində ölkədə neft hasilatının həcmi ildə 9 milyon tona yaxın idisə, 2010-cu ildə bu göstərici 50 milyon tonu ötmüş və artım 5,5 dəfə təşkil etmişdir.