Baytarlıq qanunvericiliyinin Avropa İttifaqı qanunvericiliyinə uyğunlaşdırılmasına dair seminar-treninq keçirilib

Dünən Bakıda "Azərbaycan baytarlıq qanunvericiliyinin Avropa İttifaqı qanunvericiliyinə uyğunlaşdırılması məsələsi ilə bağlı FAO-nun ekspertlərinin tövsiyələrinin müzakirəsi"nə dair seminar-treninq keçirilib. Bu barədə Kənd Təsərrüfatı Nazirliyi yanında Dövlət Baytarlıq Xidmətinin (DBX) mətbuat xidmətindən AzərTAc-a bildirmişlər.

Tədbirdə milli baytarlıq qanunvericiliyinin Avropa İttifaqı qanunvericiliyinə uyğunlaşdırılması sahəsində BMT-nin Ərzaq və Kənd Təsərrüfatı Təşkilatının (FAO) ekspertlərinin iştirakı ilə müəyyən edilmiş bir sıra boşluqların aradan qaldırılmasının işlək mexanizminin hazırlanmış ilkin variantının müzakirəsi aparılmışdır. Seminarda DBX-nin rəisi Sialə Rüstəmova qanunvericilik sahəsində aparılan islahatlardan danışmışdır. Tədbirdə FAO-nun Azərbaycandakı nümayəndəliyinin rəhbəri Təranə Bəşirova və başqaları çıxış edərək sözügedən sahədə atılan addımlardan, baytarlıq qanunvericiliyində müəyyən edilmiş boşluqlardan, özəl baytarlıq xidmətinin inkişaf etdirilməsindən və digər məsələlərdən danışmışlar.