Ağsu rayonunda kənd yolları əsaslı təmir olunur

Ağsu rayonunda kənd yolları əsaslı təmir olunur. On səkkiz min nəfər insanın yaşadığı 17 yaşayış məntəqəsini birləşdirən 25,6 kilometrlik Ağsu-Çaparlı-Bağırlı avtomobil yoluna asfalt döşənir.

AzərTAc xəbər verir ki, bu yol Prezident İlham Əliyevin rayon və kəndlərin yol-nəqliyyat infrastrukturunun yaxşılaşdırılmasına dair əlavə tədbirlər haqqında müvafiq Sərəncamına əsasən yenidən qurulur. Qeyd edək ki, burada işlərə ötən ildən başlanılmış, 3 körpü və 24 suötürücü qovşaq tikilmişdir.

Yola asfalt döşənməsi dövlətimizin başçısının "Ağsu rayonunun sosial-iqtisadi inkişafının sürətləndirilməsinə dair əlavə tədbirlər haqqında" 2012-ci il 4 dekabr tarixli Sərəncamı ilə ayrılmış 6 milyon manat vəsait hesabına həyata keçirilir. Qısa müddətdə yolun Çaparlı kəndinədək olan 8 kilometr hissəsinə asfalt döşənmişdir. Hazırda yolun təmiri sürətlə davam etdirilir.

AzərTAc