Heydər Əliyev adına Bakı neft emalı zavodunun 55 nömrəli qurğusu təmirdən sonra istismara buraxılıb

Heydər Əliyev adına Bakı neft emalı zavodunun katalitik krekinq üzrə 55 nömrəli qurğusunda təmir işləri başa çatdırılmışdır.

Zavoddan AzərTAc-a bildirmişlər ki, təmirin lazımi səviyyədə və vaxtında yerinə yetirilməsi üçün üçnövbəli iş rejimi tətbiq olunmuşdur. Mərhələli şəkildə həyata keçirilən təmir işlərinə zavodun təmir-quraşdırma üzrə 13 nömrəli sexinin, digər sexlərin müxtəlif təyinatlı briqadaları, eləcə də müəssisənin texnoloji qurğularının təmiri işlərində daim yardımçı olan kənar təşkilatlar cəlb edilmişlər. Qurğunun regeneratorunun siklon qruplarında, R-202-nin torkret beton örtüyündə, kaskad boşqablarda, buxar paylayıcılarında və buxarqızdırıcılarda yaranmış qüsurların aradan qaldırılması zamanı T-317-1/2 istidəyişdiricilərində 4 ədəd boru dəsti, MK-301/1 kompressorunda yüksək təzyiqli silindr yeniləri ilə əvəz olunmuşdur. Bundan əlavə, təmir zamanı S-102 sobasında istismara yararsız boru xətləri yenilənmiş, sobada hidravlik sınaq işləri aparılmışdır.

Hazırda katalitik krekinq qurğusu uğurla istismar olunur.

AzərTAc