Bakı şəhərinin Nobel prospektinə paralel yeni avtomobil yolu tikilir

Bakı şəhərinin Nobel prospektinə paralel 8 zolaqlı yeni avtomobil yolunun inşası davam etdirilir.

Nəqliyyat Nazirliyi "Azəryolservis" ASC-nin mətbuat xidmətindən AzərTAc-a bildirmişlər ki, layihəyə əsasən, avtomobil yolunun uzunluğu 2 min 200 metr təşkil edəcəkdir.

Eyni zamanda, yol boyu 3 piyada keçidinin tikintisi də planlaşdırılır. Piyada keçidlərindən ikisi iki giriş-çıxışlı, biri isə üç giriş-çıxışlı olacaqdır. Keçidlərin hər giriş-çıxışında ekskalatorlar quraşdırılacaqdır.

Hazırda piyada keçidlərinin birində əsas işlər başa çatdırılmışdır. Digər iki piyada keçidində isə işlərin 60 faizi görülmüşdür.

Tikinti işlərinin 2015-ci ilədək yekunlaşdırılması nəzərdə tutulmuşdur.

AzərTAc