Yeyinti məhsullarının idxalı artıb

Cari ilin yanvar-fevral ayları ərzində Azərbaycana 220,9 mln. ABŞ dolları həcmində yeyinti məhsulları idxal olunub. Bu da ötən ilin eyni dövrü ilə müqayisədə 35,82% çoxdur. SİA-nın Dövlət Gömrük Komitəsinə istinadən verdiyi xəbərə görə, yeyinti məhsullları idxalı ölkənin cəmi idxalının 12,94%-ni əhatə edib. Yeyinti məhsullları arasında əsas paya malik buğda idxalı illik 2,1 dəfə artaraq 109,0 mln. dollar təşkil edib. Bu isə cəmi idxalın 6,39%-i həcmindədir.Hesabat dövründə şəkər idxalı 49,1% azalaraq 13,7 mln. dollar, bitki, heyvan mənşəli piylər və yağlar 7,17% azalaraq 17,3 mln. dollar təşkil edib. Bu müddətdə ət, süd, kərə yağı və meyvə-tərəvəz idxalında isə artım müşahidə edilib. Ət idxalı illik 2,5 dəfə artaraq 4,0 mln. dollar, süd 8,91% artaraq 1,3 mln. dollar, kərə yağı 65,57% artaraq 4,9 mln. dollar, meyvə-tərəvəz idxalı 2,2 dəfə artaraq 11,8 mln. dollar olub.Qeyd edək ki, cari ilin yanvar-fevral ayları üzrə Azərbaycanın cəmi xarici ticarət dövriyyəsinin həcmi 4,042 mlrd. dollar təşkil edib. Bunun da 1,707 mlrd. dolları idxal, 2,335 mlrd. doilları ixrac əməliuyytalarının payına düşüb.

sia.az