Neft tələbatı artacaq OPEC

Bu il qlobal neft tələbatı artaraq 94,17 milyon barrel olacaq

Keçən ilin dekabrında Neft İxrac Edən Ölkələr Təşkilatının (OPEC) xam neft hasilatı 32 milyon 180 min barrelədək geriləyib. Bu barədə təşkilatın aylıq hesabatında deyilir. Bildirilir ki, ötən ilin dekabrda OPEC-in xam neft hasilatı noyabr ayı ilə müqayisədə gündəlik 211 min barrel azalaraq 32 milyon 180 min barrel olub. OPEC-ə üzv ölkələr arasında neft hasilatı ən çox Nigeriya, Səudiyyə Ərəbistanı, İraq, Küveyt və Venesuelada azalıb. Həmin ay İran, Liviya və Birləşmiş Ərəb Əmirliklərində isə hasilat artıb.

Hesabata görə, 2015-ci ildə gündəlik 92,92 milyon barrel olan qlobal neft tələbatı bu il gündəlik orta hesabla 1,26 milyon barrel artaraq 94,17 milyon barrel olacaq. Bu il OPEC-in xam neft tələbatı isə 2015-ci illə müqayisədə gündəlik orta hesabla 1,7 milyon barrel artaraq 31,6 milyon barrel təşkil edəcək.

sia.az