Azərbaycan- Polşa hökumətlərarası komissiyanın 7-ci iclası keçirilib

Varşavada Azərbaycan- Polşa iqtisadi əməkdaşlıq üzrə hökumətlərarası komissiyanın 7-ci iclası keçirilib. SİA-ya ölkəmizin Polşadakı səfirliyindən verilən məlumata görə, iclasda Azərbaycanın energetika naziri Natiq Əliyevin başçılıq etdiyi nümayəndə heyəti iştirak edib. İclasdan əvvəl komissiyanın həmsədrləri N. Əliyev və Polşanın Baş nazirinin müavini, inkişaf və maliyyə naziri Mateuş Moravietski arasında görüş keçirilib. Görüş zamanı iki ölkə arasında ikitərəfli iqtisadi əlaqələrin hazırkı vəziyyəti və gələcək inkişaf perspektivləri barədə fikir mübadiləsi aparılıb, digər qarşılıqlı maraq doğuran məsələlər müzakirə edilib.

Hökumətlərarası komissiyanın plenar iclasında çıxış edən N. Əliyev ölkəmizin iqtisadi potensialı, kənd təsərrüfatı, təbii və coğrafi şəraiti, turizm imkanları, qeyri-neft sektorunun inkişaf prioritetləri, xarici investisiyaların cəlb edilməsi, yerli sahibkarlığın inkişafı üçün görülən tədbirlər, neft və kimya sənayesi, yaradılmış sənaye və texnoloji parklar, Azərbaycanın da fəal iştirak etdiyi beynəlxalq layihələr, o cümlədən, Şimal-Cənub, Şərq-Qərb nəqliyyat dəhlizləri, Bakı-Tiflis-Qars dəmir yolu və s. haqqında iştirakçılara ətraflı məlumat verib.

İclasın sonunda həmsədrlər Azərbaycan Respublikası və Polşa Respublikası arasında iqtisadi əməkdaşlıq üzrə hökumətlərarası komissiyanın 7-ci iclasının yekun protokolunu imzalayıblar.

Daha sonra biznes-forum keçirilib. N. Əliyev Azərbaycanın xarici investisiyalar üçün açıq ölkə olduğunu vurğulayaraq, Polşa şirkətlərinin investisiya yatıra biləcəyi sahə və layihələrin çox olduğunu bildirib və onları Azərbaycana dəvət edib.

Hökumətlərarası komissiyanın iclası çərçivəsində AZPROMO və Polşa İnformasiya və Xarici İnvestisiyalar Agentliyi, Polşa İnkişaf Fondu, Polşa Sahibkarlığın İnkişafı Agentliyi, İxrac Kreditlərinin Sığortalanması Korporasiyası, Bakı Beynəlxalq Dəniz Ticarəti Limanı təqdimatla çıxış ediblər. Hər iki ölkənin özəl sektor nümayəndələri arasında biznes görüşlər təşkil edilib, faydalı əməkdaşlıq sahələrinin müəyyənləşdirilməsi istiqamətində ilkin təmaslar aparılıb.

Bu çərçivədə SOCAR rəsmiləri Sarmatiya layihəsi üzrə polşalı tərəfdaşları ilə uğurlu danışıqlar aparıblar. SOCARTRADING ilə Polşanın neft şirkəti olan Lotos arasında keçirilmiş görüş zamanı Polşaya xam neftin nəqli, bu ölkənin şimalında yerləşən Qdansk şəhərindəki dəniz terminalına isə LPG və LNG məhsullarının çatdırılması ilə bağlı aparılmış danışıqlarda razılıqlar əldə edilib.

Energetika naziri N. Əliyev Polşaya səfəri çərçivəsində, həmçinin bu ölkənin energetika naziri Kşıştof Txujevski, Polşa Prezidenti Administrasiyasının xarici siyasət üzrə naziri Kşıştof Şçerski, xarici işlər nazirinin müavini Marek Jilkovski, inkişaf nazirinin müavini Tadeuş Koşçinski, energetika nazirinin müavini Mixal Kurtıka və Mazovetski vilayətinin voyevodası Zdislav Sipiera ilə ikitərəfli görüşlər keçirib.

Azərbaycanın Polşadakı fövqəladə və səlahiyyətli səfiri Həsən Həsənov görüşlərdə iştirak edib.

sia.az