"Əmək və Məşğulluq" mövzusunda görüş olub

İqtisadi İslahatların Təhlili və Kommunikasiya Mərkəzində (İİTKM) Əmək və Əhalinin Sosial Müdafiəsi Nazirliyi tərəfindən ölkəmizdə əmək və məşğulluq sahəsində islahatların yeni mühüm mərhələsinə keçidi təmin edən "Əmək və Məşğulluq" altsisteminin (ƏMAS) sahibkarlarla müzakirəsinə həsr olunmuş görüş keçirilib. SİA xəbər verir ki, dəyirmi masada İİTKM-in icraçı direktoru Vüsal Qasımlı, Milli Məclisin Komitə sədri Musa Quliyev, Əmək və Əhalinin Sosial Müdafiəsi nazirinin müavini Anar Əliyev, KOBİA-nın İdarə Heyətinin sədri Orxan Məmmədov və Dövlət Məşğulluq Agentliyinin sədri Mustafa Abbasbəyli çıxış ediblər.Natiqlər "Əmək və Məşğulluq" altsistemi İstifadəyə verilməsinin əmək münasibətlərində köklü dəyişikliklərə səbəb olacağı vurğulanıb. Bildirilib ki, yeni altsistemin tətbiqi əmək bazarının bütün iştirakçıları üçün faydalı olacaqdır və ölkemizdə bu sahə üzrə ciddi dəstək mexanizmi formalaşdırır. Belə ki, sözügedən altsistem vasitəsilə əmək müqavilələrinin kağız üzərində deyil, e-qaydada bağlanması, rəqəmsal kadr uçotuna keçilməsi, əmək münasibətləri zamanı kağız üzərində aparılan digər əməliyyatların rəqəmsal müstəviyə keçirilməsi təmin olunur. Həmçinin bu e-platforma işsiz və işaxtaran şəxslərin aktiv məşğulluq proqramlarına əlçatanlığını daha da artıracaq.Görüşdə Azərbaycan Sahibkarlar Konfederasiyasının, "Paşa Holding" MMC-in, Azərbaycan Mikromaliyyə Assosiasiyasının, "Azərbaycan Sığortaçılar Assosiasiyası" İB-in, Auditorlar palatasının, Azərbaycan Banklar Assosiasiyasının, Azərbaycan-Fransa Ticarət Palatasının, AMCHAM-ın, Azərbaycan Sənaye Korporasiyasının, "Türkiyə və Azərbaycan İş Adamları və Sənayeçilər" İB-in, Azərbaycan Qiymətləndiricilər Cəmiyyətinin və Azərbaycan Türkiyə İş Adamları Birliyini nümayəndələri iştirak edib. Müzakirələr zamanı sahibkar təşkilatlarının nümayəndələrini maraqlandıran suallar cavablandırılıb.

sia.az