2025-ci il - “Konstitusiya və Suverenlik İli”

2025-ci il Azərbaycanda “Konstitusiya və Suverenlik İli” kimi qeyd olunur. Bu ilin belə adlandırılması dərin mənaya malikdir və dövlət müstəqilliyimizin möhkəmləndirilməsi, milli dəyərlərimizin qorunması və Konstitusiyamızın cəmiyyət həyatında rolunun artırılması baxımından xüsusi əhəmiyyət daşıyır. Azərbaycan Konstitusiyası dövlətin əsas qanunu kimi xalqın iradəsini ifadə edir, ölkədə hüquqi, demokratik və dünyəvi dövlət quruluşunun əsasını təşkil edir. Suverenlik isə dövlətin daxili və xarici siyasətini müstəqil şəkildə müəyyən etmək, öz milli maraqlarını qorumaq və inkişaf etdirmək imkanını təmin edən ən ali hüquqdur. 2025-ci ilin “Konstitusiya və Suverenlik İli” elan edilməsi Azərbaycan dövlətçiliyinin inkişafında yeni mərhələnin başlanğıcı kimi qiymətləndirilir. Bu il ərzində ölkədə konstitusiya dəyərlərinin təbliği, vətəndaşların hüquq maarifinin artırılması, dövlət suverenliyinin qorunması və gücləndirilməsi istiqamətində müxtəlif tədbirlərin keçirilməsi nəzərdə tutulur. Azərbaycanın müstəqil siyasət yürütməsi, beynəlxalq aləmdə öz mövqeyini qətiyyətlə müdafiə etməsi suverenliyin praktiki təzahürüdür. Konstitusiya və suverenlik anlayışları bir-birini tamamlayır, çünki hər iki dəyər xalqın azadlığını, dövlətin müstəqilliyini və cəmiyyətin inkişafını təmin edən sütunlardır. Ulu öndər Heydər Əliyevin rəhbərliyi ilə qəbul olunmuş 1995-ci il Konstitusiyası müasir Azərbaycanın hüquqi-siyasi təməlini qoymuş, ölkəmizin inkişaf strategiyasını müəyyən etmişdir. Bugün Prezident İlham Əliyevin rəhbərliyi altında bu ideyalar uğurla davam etdirilir, suverenliyimizin qorunması və milli maraqlarımızın müdafiəsi dövlət siyasətinin əsas istiqamətlərindən biridir. “Konstitusiya və Suverenlik İli” hər bir vətəndaş üçün dövlətə sədaqətin, milli birliyin və hüquqa hörmətin rəmzidir. Bu il ölkəmizin gələcək inkişafına, hüquqi düşüncənin möhkəmlənməsinə və Azərbaycan dövlətçiliyinin daha da güclənməsinə mühüm töhfə verəcəkdir.

Pərviz Məcnunov
YAP Laçın rayon təşkilatının mühasibi