Üç rəngdə təcəssüm edən milli qürur və dövlətçilik iradəsi - ŞƏRH

Dövlət rəmzləri hər bir xalqın tarixini, milli kimliyini, mənəvi dəyərlərini və gələcəyə olan inamını özündə yaşadan müqəddəs atributlardır. Bayraq, gerb və himn dövlət müstəqilliyinin, suverenliyin və milli birliyin ifadəsidir. Bu rəmzlərə ehtiram göstərmək yalnız rəsmi mərasimlərdə yerinə yetirilən bir qayda deyil, hər bir vətəndaşın mənəvi məsuliyyəti və vətəndaşlıq borcudur. Azərbaycan Respublikasının üçrəngli Dövlət Bayrağı da xalqımızın azadlıq iradəsini, zəngin tarixi keçmişini və müstəqil gələcəyə bağlılığını təcəssüm etdirir.

Hər il noyabrın 9-da qeyd etdiyimiz Dövlət Bayrağı Günü bizə bu müqəddəs rəmzin mənasını bir daha xatırladır. Bayrağımızın rənglərində xalqımızın milli-mənəvi dünyası, dövlətçilik arzuları və tarixi taleyi əks olunur. Mavi rəng türk mənşəyimizi və türkçülük ənənələrimizi, qırmızı rəng müasirliyi, inkişafı və demokratik dəyərləri, yaşıl rəng isə İslam sivilizasiyasına mənsubluğumuzu ifadə edir. Ay-ulduz isə milli bayrağımızın bütövlüyünü tamamlayan, tariximiz və mədəniyyətimizlə bağlı rəmzlərdəndir. Bu rənglərə baxarkən biz yalnız bir bayrağı deyil, bütöv bir xalqın keçdiyi yolu, mübarizəsini və arzularını görürük. Azərbaycanın üçrəngli bayrağının tarixi 1918-ci ildə yaradılmış Azərbaycan Xalq Cümhuriyyəti ilə bağlıdır. Həmin dövrdə qəbul edilən milli bayraq müstəqil dövlət quruculuğunun mühüm rəmzinə çevrildi. Xalq Cümhuriyyətinin süqutundan sonra bayrağımız uzun müddət rəsmi dövlət atributu kimi istifadə olunmasa da, onun ifadə etdiyi azadlıq və müstəqillik ideyası xalqımızın yaddaşında yaşadı. Nəhayət, 1991-ci ildə Azərbaycan dövlət müstəqilliyini bərpa etdikdən sonra üçrəngli bayrağımız yenidən müstəqil dövlətimizin əsas rəmzlərindən biri kimi təsdiq olundu. Bu tarixi prosesdə Ümummilli Lider Heydər Əliyevin təşəbbüsü və qətiyyətli mövqeyi xüsusi əhəmiyyət daşıyır. 1990-cı il noyabrın 17-də Naxçıvan Muxtar Respublikası Ali Sovetinin sessiyasında Heydər Əliyevin sədrliyi ilə üçrəngli milli bayrağımız ilk dəfə Naxçıvanda rəsmi şəkildə qaldırıldı. Həmin sessiyada muxtar respublikanın adından “Sovet Sosialist” sözlərinin çıxarılması, milli dövlətçilik atributlarının bərpası və 1918-ci ildə Azərbaycan Xalq Cümhuriyyəti tərəfindən qəbul edilmiş üçrəngli bayrağın Naxçıvanın dövlət bayrağı kimi qəbul olunması barədə tarixi qərarlar verildi. Bu addım o dövrün mürəkkəb siyasi şəraitində böyük cəsarət və uzaqgörənlik tələb edirdi. Bu hadisə Azərbaycan dövlətçilik tarixinin ən mühüm səhifələrindən biri hesab edilir. Çünki Naxçıvanda qaldırılan üçrəngli bayraq yalnız bir binanın üzərində dalğalanan rəmz deyildi. O, xalqın müstəqillik istəyinin, milli özünüdərkin və azad yaşamaq iradəsinin açıq ifadəsi idi. Heydər Əliyevin təşəbbüsü ilə atılan bu addım milli dövlətçilik ənənələrinin bərpasına güclü təkan verdi və sonrakı siyasi proseslər üçün mühüm mənəvi-siyasi zəmin yaratdı. Naxçıvanda başlanan bu tarixi yol Azərbaycanın dövlət müstəqilliyinin bərpası istiqamətində atılan addımlarla üzvi şəkildə bağlıdır.

Ümummilli Lider Heydər Əliyev dövlət rəmzlərinin əhəmiyyətini daim yüksək qiymətləndirir, bayrağımızı müstəqilliyimizin və milli qürurumuzun rəmzi kimi səciyyələndirirdi. Onun dövlətçilik düşüncəsində bayrağa ehtiram xalqın tarixinə, dövlətinə və gələcəyinə ehtiram demək idi. Bu gün müstəqil Azərbaycanımızın üçrəngli bayrağı ölkəmizin hər yerində, beynəlxalq təşkilatların qarşısında və dünyanın müxtəlif guşələrində dalğalanır. Bu mənzərə hər bir azərbaycanlıda qürur hissi yaradır, müstəqilliyimizin necə böyük tarixi dəyər olduğunu bir daha göstərir. Dövlət bayrağına hörmət ilk növbədə onu tanımaqdan, mənasını dərk etməkdən və onun təmsil etdiyi dəyərlərə sadiq qalmaqdan başlayır. Bayrağımızın dövlət tədbirlərində, təhsil müəssisələrində, ictimai məkanlarda və müxtəlif mərasimlərdə ucaldılması mühüm rəmzi məna daşıyır. Lakin ehtiram yalnız bayrağın qarşısında dayanmaqla məhdudlaşmır. Vətəndaş öz gündəlik davranışı, qanunlara hörməti, məsuliyyətli mövqeyi, əməyə münasibəti və cəmiyyətə faydalı fəaliyyəti ilə də dövlətinə və bayrağına bağlılığını nümayiş etdirir. Dövlət rəmzlərinə hörmət hissinin formalaşmasında ailənin, təhsil müəssisələrinin və bütövlükdə cəmiyyətin üzərinə mühüm vəzifələr düşür. Uşaqlara bayrağımızın rənglərini əzbərlətmək vacibdir, lakin bununla kifayətlənmək olmaz. Onlara bu rənglərin mənasını, bayrağın hansı tarixi şəraitdə yarandığını, müstəqilliyimizin hansı çətinliklər və fədakarlıqlar bahasına əldə olunduğunu yaşlarına uyğun şəkildə izah etmək lazımdır. Uşaq bayrağa yalnız bir təsvir kimi deyil, öz xalqının kimliyini və dövlətinin varlığını ifadə edən müqəddəs rəmz kimi yanaşmağı öyrənməlidir.

Məktəbəqədər təhsil müəssisələrində bu istiqamətdə aparılan maarifləndirici işlərin xüsusi əhəmiyyəti var. Erkən yaşlardan uşaqlarda Vətənə sevgi, dövlət rəmzlərinə hörmət, milli-mənəvi dəyərlərə bağlılıq və birlik hissi formalaşdırılmalıdır. Bayraq Gününə həsr olunan tədbirlər, maarifləndirici söhbətlər, şeirlər, mahnılar və yaş səviyyəsinə uyğun yaradıcı fəaliyyətlər uşaqların bu mövzuda ilkin təsəvvürlərini zənginləşdirir. Belə tədbirlərin əsas məqsədi yalnız bayramı qeyd etmək deyil, uşaqların qəlbində Vətənə məhəbbət və milli qürur hissinin təməlini qoymaqdır. Rəhbərlik etdiyim təhsil müəssisəsində də uşaqların milli-mənəvi dəyərlər ruhunda tərbiyə olunmasını vacib istiqamətlərdən biri hesab edirəm. Pedaqoji kollektivin üzərinə düşən vəzifə bu dəyərləri uşaqlara sadəcə sözlə çatdırmaq deyil, gündəlik fəaliyyətində nümunə göstərməkdir. Dövlət bayrağına ehtiram, Azərbaycan tarixinə və mədəniyyətinə sevgi, bir-birinə hörmət və məsuliyyətli davranış təlim-tərbiyə prosesinin ayrılmaz hissəsi olmalıdır. Çünki bu gün kiçik yaşlarından milli ruhda böyüyən uşaqlar sabah dövlətimizin gələcəyini formalaşdıracaq vətəndaşlardır. Milli həmrəylik və azərbaycançılıq məfkurəsi də dövlət rəmzlərimizə münasibətdə mühüm yer tutur. Azərbaycan bayrağı ölkəmizdə yaşayan bütün vətəndaşları vahid dövlətçilik ideyası ətrafında birləşdirən ümumi dəyərdir. Dilimizə, mədəniyyətimizə, tariximizə və dövlətçiliyimizə bağlılıq cəmiyyətimizdə həmrəyliyi gücləndirir. Bayrağımızın altında birləşmək fərqli düşüncələrə və dünyagörüşlərinə malik insanların ortaq Vətənə, ortaq tarixə və ortaq gələcəyə sahib olduqlarını dərk etməsidir. Bu gün Azərbaycan güclü, müstəqil və beynəlxalq aləmdə öz mövqeyini möhkəmləndirən dövlətdir. Dövlət bayrağımızın dünyanın müxtəlif ölkələrində və beynəlxalq platformalarda dalğalanması xalqımızın qazandığı uğurların, dövlətimizin nüfuzunun və müstəqilliyimizin göstəricisidir. Bayrağımızın ucalığı həm də üzərimizə böyük məsuliyyət qoyur: dövlətimizin inkişafına töhfə vermək, milli dəyərlərimizi qorumaq, gələcək nəsillərə müstəqil və güclü Azərbaycan miras qoymaq. Dövlət rəmzlərinə hörmət hər bir azərbaycanlının gündəlik həyatında öz əksini tapmalıdır. Bayrağımızı qorumaq, onun nüfuzuna layiq davranmaq, dövlətimizin qanunlarına və dəyərlərinə hörmət etmək hamımızın borcudur. Bu borc yaşından, peşəsindən və tutduğu vəzifədən asılı deyil. Hər kəs öz fəaliyyəti, vicdanlı əməyi və vətəndaş mövqeyi ilə ölkəmizin inkişafına xidmət edə bilər. Şanlı üçrəngli bayrağımıza bəslədiyimiz sevgi və ehtiram gələcək nəsillərə də ötürüləcəkdir. Bayrağımızın hər dalğalanışı bizə müstəqilliyimizin qədrini bilməyi, tariximizi unutmamağı və milli birliyimizi qorumağı xatırladır. Ümummilli Lider Heydər Əliyevin dövlətçilik irsi, o cümlədən Naxçıvanda üçrəngli bayrağımızın ucaldılması ilə bağlı tarixi təşəbbüsü bu gün də bizim üçün mühüm örnəkdir.

Azərbaycan Respublikasının Prezidenti cənab İlham Əliyevin sərəncamı ilə 2009-cu ildən etibarən hər il noyabr ayının 9-u Azərbaycanda Dövlət Bayrağı Günü kimi qeyd olunur. 9 Noyabr – Dövlət Bayrağı Günü münasibətilə hər bir soydaşımızı bu əlamətdar gün münasibətilə təbrik edir, dövlət rəmzlərimizə daim ehtiramla yanaşmağı arzulayıram. Qoy üçrəngli bayrağımız müstəqil Azərbaycanımızın səmasında daim ucalarda dalğalansın, birliyimizin, azadlığımızın və milli qürurumuzun rəmzi olaraq gələcək nəsillərə əmanət qalsın!

Lamiyə Abdullayeva

YAP Naxçıvan şəhər təşkilatı “Afiyəddin Cəlilov küçəsi” ünvanında yerləşən ərazi partiya təşkilatının sədri,

YAP Naxçıvan şəhər təşkilatının fəal üzvü