Gənclər gələcəyin əsas aparıcı qüvvəsidir ŞƏRH

Bugünkü dünyada dövlətlərin gələcəyi böyük ölçüdə gənclərə necə yanaşmasından asılıdır. Gənclər yalnız demoqrafik üstünlük deyil, eyni zamanda intellektual potensial, yenilikçi düşüncə və gələcəyin əsas aparıcı qüvvəsidir. Bu baxımdan Azərbaycan gənclərə yönəlik siyasətində bir çox ölkələri, o cümlədən beynəlxalq ictimaiyyəti qabaqlayan, ardıcıl və sistemli bir model formalaşdırmağı bacarıb.Azərbaycanda gənclər siyasəti təsadüfi qərarlar toplusu deyil, strateji baxışın nəticəsidir. Ulu Öndər Heydər Əliyevin müəyyənləşdirdiyi siyasi kursda gənclər hər zaman xüsusi diqqət mərkəzində olub. Bu xətt sonrakı dövrlərdə daha da təkmilləşdirilərək Prezident İlham Əliyevin rəhbərliyi ilə konkret proqramlar, dövlət strategiyaları və institusional mexanizmlər vasitəsilə davam etdirilib.Gənclərin təhsili, məşğulluğu, sosial müdafiəsi, vətənpərvərlik ruhunda yetişdirilməsi və ictimai-siyasi proseslərdə fəal iştirakı dövlət siyasətinin prioritet istiqamətləri kimi müəyyən edilib. Bu yanaşma bir çox ölkələrdə hələ də parçalanmış və epizodik xarakter daşıdığı halda, Azərbaycanda vahid konsepsiya əsasında icra olunur.Mənim fikrimcə, Azərbaycan gənclər siyasətinin ən güclü tərəflərindən biri təhsilə verilən dəyərdir. Təhsil yalnız bilik ötürülməsi deyil, milli düşüncə, qlobal baxış və peşəkar bacarıqların sintezidir. Dövlət xətti ilə həyata keçirilən xaricdə təhsil proqramları, ali məktəblərin maddi-texniki bazasının gücləndirilməsi, rəqəmsal bacarıqların təşviqi və peşə təhsilinin yenidən qurulması gənclərin real əmək bazarına inteqrasiyasını sürətləndirir.Bir çox ölkələrdə gənclər ali təhsil aldıqdan sonra işsizlik problemi ilə üzləşdiyi halda, Azərbaycanda bu boşluq mərhələli şəkildə aradan qaldırılır. Təhsil və məşğulluq siyasətinin paralel aparılması beynəlxalq təcrübədə nadir hallarda bu qədər sistemli şəkildə tətbiq olunur.Məncə, Azərbaycan modelini fərqləndirən əsas cəhətlərdən biri gənclərə real şəkildə etimad göstərilməsidir. Gənclər təkcə tədbirlərin iştirakçısı deyil, qərarların hazırlanması və icrasında tərəfdaş kimi çıxış edirlər. Dövlət qurumlarında, bələdiyyələrdə, ictimai şuralarda və könüllülük hərəkatlarında gənclərin fəal iştirakı bunun bariz nümunəsidir.Şəxsi mövqeyim ondan ibarətdir ki, bu yanaşma gənclərdə məsuliyyət hissini və dövlətə bağlılığı daha da gücləndirir. Bir çox ölkələrdə gənclər idarəetmədən kənarda qalır və bu, zamanla sosial narazılığa səbəb olur. Azərbaycanda isə gənclər özlərini proseslərin içində hiss edirlər.Gənclər siyasətinin mühüm istiqamətlərindən biri də milli-mənəvi dəyərlərin qorunması və vətənpərvərlik ruhunun formalaşdırılmasıdır. Xüsusilə Vətən müharibəsi dövründə və ondan sonrakı mərhələdə gənclərin nümayiş etdirdiyi birlik, fədakarlıq və yüksək vətəndaş məsuliyyəti aparılan siyasətin real nəticələrini göstərdi.Məncə, beynəlxalq ictimaiyyət üçün Azərbaycan təcrübəsinin ən diqqətçəkən tərəfi məhz budur: qloballaşma şəraitində milli kimliyi qoruyaraq müasir, dünyaya açıq və güclü gənclik formalaşdırmaq. Bu balansı qorumaq bir çox dövlətlər üçün ciddi çağırış olaraq qalır.Bir çox inkişaf etmiş ölkələr gənclər siyasətini əsasən sosial problemlərin həlli prizmasından qurur. Azərbaycanda isə bu siyasət daha geniş düşünülüb – gənclər gələcək problemlərin deyil, gələcək imkanların daşıyıcısı kimi qiymətləndirilir. Dövlət proqramlarının preventiv xarakter daşıması, yəni problemlər yaranmadan onların qarşısının alınmasına yönəlməsi Azərbaycan modelini qabaqlayıcı edir.Bu mənada hesab edirəm ki, Azərbaycan təkcə regional deyil, qlobal miqyasda da öyrənilə biləcək bir gənclər siyasəti modeli formalaşdırıb.Nəticə etibarilə, Azərbaycanın gənclərə yönəlik siyasəti sadəcə sosial sahə deyil, milli inkişaf strategiyasının əsas sütunlarından biridir. Bu siyasət gəncləri passiv dəstək obyektindən aktiv inkişaf subyektinə çevirir. Şəxsi düşüncəmə görə, məhz bu yanaşma Azərbaycanın gələcək onilliklərdə də sabit, güclü və rəqabətqabiliyyətli dövlət kimi mövqeyini qorumasını təmin edəcək.Bu gün gənclərə yatırım edən Azərbaycan əslində öz sabahına yatırım edir və bu baxımdan bir çox ölkələri, o cümlədən beynəlxalq ictimaiyyəti qabaqlayan uğurlu yol xəritəsi ortaya qoyur.

Cahandur Məhərrəmov

YAP Şərur rayon təşkilatının məsləhətçisi