Livanla İsrail arasında atəşkəsə nail olundu - FOTO

ABŞ Prezidenti Donald Tramp İsrail və Livanın atəşkəs razılaşmasına nail olduqlarını açıqlayıb. Bu barədə D.Tramp özünün Truth Social hesabında paylaşım edib. Tramp Livanın çox hörmətli prezidenti Cozef Aun və İsrailin Baş naziri Benyamin Netanyahu ilə "əla danışıqlar" apardığını söyləyib: “Bu iki lider ölkələri arasında sülhə nail olmaq üçün rəsmi olaraq saat 17:00-da 10 günlük atəşkəsə başlayacaqları barədə razılığa gəldilər. Çərşənbə axşamı hər iki ölkə 34 ildən sonra ilk dəfə Vaşinqtonda gözəl dövlət katibimiz Marko Rubio ilə görüşdülər”.

ABŞ Prezidenti əlavə edib ki, vitse-prezident J.D. Vensə və dövlət katibi Rubioya, eləcə də Birləşmiş Qərargah Rəisləri Komitəsinin sədri Dan Razin Keynə İsrail və Livanla davamlı sülhə nail olmaq üçün işləməyi tapşırıb: “Dünyada doqquz müharibəni həll etmək mənim üçün şərəf idi və bu, mənim 10-cu müharibəm olacaq, ona görə də gəlin bunu edək".

Qeyd edək ki, 9 apreldə Netanyahu İsrailin Hizbullahın tərksilah edilməsi və münasibətlərin normallaşdırılması ilə bağlı Livanla birbaşa danışıqlara başlayacağını açıqlayıb.

Bir neçə Avropa paytaxtı İsrailin Hizbullaha qarşı mübarizədə Livan ərazisinə son hücumlarına qəzəbləndiyini bildirdi. Bu hücumlar yüzlərlə mülki şəxsin ölümünə və minə yaxın insanın yaralanmasına səbəb oldu.

İran İsrailin Livana hücumlarını davam etdirəcəyi təqdirdə ABŞ ilə müqavilədən çıxmaq niyyətində olduğunu bildirib.

İlham