Azərbaycan – enerji sahəsində etibarlı və strateji tərəfdaş

Azərbaycan son illərdə həyata keçirdiyi məqsədyönlü enerji siyasəti nəticəsində yalnız regionun deyil, Avropanın və digər tərəfdaş ölkələrin enerji təhlükəsizliyinə mühüm töhfə verən dövlətlərdən birinə çevrilib. Zəngin enerji resursları, əlverişli coğrafi mövqeyi, müasir infrastruktur imkanları və etibarlı tərəfdaşlıq siyasəti Azərbaycanın beynəlxalq enerji sistemində rolunu əhəmiyyətli dərəcədə artırıb.
Ölkəmizin enerji siyasətinin əsas istiqamətlərindən biri enerji resurslarının hasilatı ilə yanaşı, onların təhlükəsiz və səmərəli şəkildə dünya bazarlarına çatdırılmasıdır. Bu məqsədlə illər ərzində mühüm neft və qaz kəmərləri, terminallar və digər enerji infrastrukturu yaradılıb. Bakı-Tbilisi-Ceyhan neft kəməri, Cənub Qaz Dəhlizi və onun əsas seqmentlərindən olan Trans-Anadolu və Trans-Adriatik qaz kəmərləri Azərbaycanın enerji xəritəsində mövqeyini daha da möhkəmləndirib.
Azərbaycan təbii qazının müxtəlif ölkələrin enerji bazarlarına çıxarılması ölkəmizin beynəlxalq enerji əməkdaşlığında əhəmiyyətini artırıb. Xüsusilə Avropanın enerji təhlükəsizliyinin təmin olunmasında Azərbaycanın rolu son illərdə daha çox diqqət çəkir. Azərbaycan qazının Avropa bazarlarına nəqli enerji mənbələrinin şaxələndirilməsinə və istehlakçı ölkələrin enerji təhlükəsizliyinin gücləndirilməsinə xidmət edir.
Azərbaycanın enerji siyasətində mühüm xüsusiyyətlərdən biri də etibarlı tərəfdaşlıq prinsipidir. Ölkəmiz enerji layihələrində iştirak edən dövlətlərlə qarşılıqlı maraqlara, uzunmüddətli əməkdaşlığa və etimad mühitinə əsaslanan münasibətlər qurur. Bu yanaşma Azərbaycanın beynəlxalq enerji layihələrində etibarlı tərəfdaş kimi qəbul edilməsinə şərait yaradıb.
Bu gün Azərbaycanın enerji əməkdaşlığı yalnız neft və təbii qazla məhdudlaşmır. Ölkəmiz bərpaolunan enerji mənbələrinin inkişafını da strateji prioritetlərdən biri kimi müəyyənləşdirib. Xəzər dənizinin külək enerjisi potensialından istifadə, günəş və külək elektrik stansiyalarının yaradılması, yaşıl enerjinin istehsalı və ixracı istiqamətində həyata keçirilən layihələr Azərbaycanın gələcək enerji strategiyasının mühüm hissəsini təşkil edir.
Qarabağ və Şərqi Zəngəzur iqtisadi rayonlarında da yaşıl enerji potensialından səmərəli istifadə üçün geniş imkanlar mövcuddur. Bu ərazilərdə yaradılan müasir enerji infrastrukturu həm regional inkişafı sürətləndirir, həm də Azərbaycanın bərpaolunan enerji sahəsində imkanlarını genişləndirir.
Azərbaycanın enerji siyasətinin digər mühüm istiqaməti enerji təhlükəsizliyi ilə iqtisadi inkişaf arasında qarşılıqlı əlaqənin təmin edilməsidir. Enerji layihələrindən əldə olunan gəlirlər ölkənin iqtisadi potensialının artırılmasına, infrastrukturun yenilənməsinə, sosial layihələrin həyata keçirilməsinə və regionların inkişafına yönəldilir. Bununla yanaşı, enerji sahəsində formalaşmış əməkdaşlıq Azərbaycanın beynəlxalq iqtisadi və siyasi əlaqələrinin genişlənməsinə də mühüm təsir göstərir.
Azərbaycanın enerji sahəsində əldə etdiyi nəticələr ölkəmizin beynəlxalq mövqeyinin möhkəmlənməsinə xidmət edir. Enerji resurslarının istehsalçısı, tranzit ölkəsi və gələcəkdə yaşıl enerjinin ixracatçısı kimi Azərbaycanın imkanları genişlənir. Bu isə ölkəmizin regional və qlobal enerji təhlükəsizliyində iştirakını daha da artırır.
Nəticə etibarilə, Azərbaycan bu gün enerji sahəsində bir sıra ölkələr üçün mühüm və strateji tərəfdaşa çevrilib. Etibarlı enerji təminatı, müasir infrastruktur, geniş tranzit imkanları və bərpaolunan enerji potensialı ölkəmizin beynəlxalq enerji əməkdaşlığında rolunu daha da gücləndirir. Azərbaycanın qarşıdakı dövrdə də enerji sahəsində yeni layihələr həyata keçirərək həm milli iqtisadi inkişafına, həm də tərəfdaş ölkələrin enerji təhlükəsizliyinə mühüm töhfələr verəcəyi gözlənilir.

Süleyman Tağıyev
YAP Sədərək rayon təşkilatının məsləhətçisi